"Qazaqstan" RTRK tapsyrysy boiynsha túsirilgen derekti film 12 bólimnen turady. Onda shet elderde turatyn qazaqtardyń ómiri men turmysy týraly baiandalady, dep xabarlaidy QazAqparat tilshisi.
"Qazaqstan" RTRK basqarma tóraǵasy Erlan Karinniń aitýynsha, atalǵan jobanyń negizgi maqsaty - shetelge qonys aýdarǵan qandastyrymyzdyń ómiri men turmys-saltyn kópshilikke kórsetý. "Filmde Mońǵoliia, Aýǵanstan, Qytai, Túrkiia, Iran jáne taǵy basqa da memleketterde turatyn qazaqtardyń taǵdyry jaiynda baiandalady. Ony túsirý ońaiǵa túspedi. Sebebi texnikany aparý kerek. Túsirý jumystaryn aldyn ala kelisý kerek jáne taǵysyn taǵy. Bir ret Iranda jergilikti politsiia túsirý tobynyń texnikasyn tárkilep qoidy. Degenmen, biz óz jobamyzdy oidaǵydai jasap shyqtyq. "Kóshpendiler" derekti filmder toptamasy ulttyq arnanyń efirinen 14 qazannan bastap 23 jeltoqsanǵa deiin kórsetiledi", - dedi E.Karin Astanada ótken baspasóz máslixatynda.
Filmniń rejisseri - Qanat Beisekeev. Al alǵashqy filmniń keiipkeri - Aisholpan Nurǵaiypqyzy. 17 jastaǵy búrkitshi qyz Qazaqstanǵa alǵash ret kelip otyr. Baspasóz máslixatynda Aisholpan qatty qobaljyp, birden sóilei almady. "Meni... osynda shaqyrǵanyńyzǵa... óte rizamyn. Raqmet aitamyn. Men kóp elde bolsam da, Qazaqstanǵa kelýdi armandap júrdim. Búgin arnym oryndalyp otyr. Sol úshin bilim-innovatsiia qoryna jáne Erlan aǵaǵa raqmet aitqym keledi", - dedi A.Nurǵaiypqyzy.
Aita keteiik, 2014 jyly aǵylshynnyń "Daily Mail" basylymy qusbegilik ónerin igergen 13 jastaǵy qazaq qyzy týraly maqala jariialap, Aisholpandy búkil álemge tanymal etti. Osydan keiin rejisser Otto Bell "Búrkitshi qyz" (The Eagle Huntres) atty derekti filmdi túsirdi. Atalǵan film Oskar syilyǵyna úmitker úzdik 15 filmniń qataryna da endi. Sol kezde film avtorlary túsirilim jumystaryn qalai júrgizgenin de aityp berdi.
Al Avstraliianyń ánshisi Siia Ferler «Angel by the Wings» atty ánine klipti shyǵardy. Atalǵan shyǵarma Mońǵoliiadaǵy búrkitshi qazaq qyzy Aisholpan Nurǵaiypqyzy týraly derekti filmniń resmi saýndtregi bolyp sanalady.
