Foto: Aqorda
Býrabaida Prezident Qasym-Jomart Toqaevtyń qatysýymen Ulttyq quryltaidyń IV otyrysy bastaldy, dep habarlaidy Ult.kz.
Atyraýdaǵy otyrystan keiin arnaiy jospar qabyldandy. Soǵan sáikes Parlament depýtattarynyń qoldaýymen turmystyq zorlyq-zombylyqqa, qumar oiynǵa, nashaqorlyqqa, esirtki saýdasyna jáne vandalizmge qarsy zańdar qabyldandy. Elektrondy shylym túrlerin óndirýge jáne satýǵa tyiym salyndy. Memlekettik nagradalar qatary mártebeli ataqtarmen tolyqty. Kitap oqý mádenietin qalyptastyrý úshin Ulttyq kitap kúni bekitildi.
Jalpy byltyrǵy quryltaida aitylǵan bastamalardy júzege asyrý úshin bir jyldyń ishinde 10 zań daiyndalyp, qazirdiń ózinde sonyń toǵyzy qabyldandy.
Biyl quryltai aiasynda óńirlermen jumys isteý formaty engizildi. Ulttyq quryltai músheleri aimaqtarǵa shyǵyp, kezdesýler ótkize bastady. Bul aimaqtaǵy belsendi azamattardyń pikirin eskerýge de múmkindik berdi, - dedi Memlekettik keńesshi Erlan Qarin jiyndy asha otyryp.
Otyrysta Memleket basshysy sóz sóileidi. Sondai-aq Ulttyq quryltai músheleri qoǵamdaǵy ózekti máselelerge qatysty usynystaryn ortaǵa salady.
Aita ketý kerek, quryltaidyń paneldik sessiialary keshe ótti. Ol sektsiialardyń taqyryptary azamattyq qoǵam, mádeniet, óner, rýhaniiat, bilim jáne ǵylym, áleýmettik-ekonomikalyq damý máselelerin qamtydy.
Buǵan deiin Mádeniet jáne aqparat ministri Aida Balaeva jiynnyń alǵashqy kúninde aitylǵan usynystar týraly málimet bergen edi.
Al Ǵylym jáne joǵary bilim ministri Saiasat Nurbek Ulttyq quryltaidyń 4-otyrysy aiasynda Qazaqstan tarihynyń jańa akademiialyq basylymy ázirlenetinin aitty.
2022 jyly Ulttyq quryltai alǵash jandanǵannan beri eldegi áleýmettik-ekonomikalyq máseleler sheshim taýyp keledi. Jyl ótken saiyn taqyryp aiasy keńidi, aitylatyn salmaqty oi ulǵaidy.
