Býrabai ulttyq parkinde karantin talaptary saqtalyp jatqan joq, dep habarlaidy "Ult aqparat" «Habar 24» telearnasyna silteme jasap.
Demalys kúnderi «Býrabai» ulttyq tabiǵi parkindegi jaǵajailarda ine shanshar oryn bolmaidy. Demalýshylardy sýǵa shomylýǵa resmi túrde salynǵan tyiym da, tipti «jaǵajailar karantinge bailanysty jabyq» dep jazylǵan resmi taqtaisha da toqtata almady. Sanitarlyq normalardy saqtamai, saqtyq sharalaryn umytyp, myńdaǵan demalýshy bos ýaqytyn jaǵajaida ótkizýde. Jaýapty tulǵalar men politsiia qyzmetkerleri reid júrgizýde, biraq týrister olardan qaimyqpaidy.
Býrabaidaǵy arnaiy jabdyqtalmaǵan birneshe shaqyrym jaǵajai adamǵa toly.
Sanitarlyq norma, maska rejimi men áleýmettik qashyqtyq týraly sóz qozǵaýdyń ózi qiyn. Politseiler reid kezinde tekserip jatyr. Alaida, karantindi buzýshylardyń kópshiligine aýyzsha eskertý ǵana aitylady. Shekteý sharalary engizilgen sátten bastap 8 adamǵa ǵana aiyppul salynǵan.
«Olardan jazbasha túsinikteme, jeke kýáliktiń kóshirmesi alynady, ákimshilik materialdar rásimdelip, aqparatty esepke alý kitabyna (AEK) tirkeledi, sodan keiin isti Taýarlar men qyzmetterdiń sapasy men qaýipsizdigin baqylaý bólimine tapsyrady. Bul mekemeniń qyzmetkerleri ákimshilik hattama toltyrady. Bul 2-den 3 saǵatqa sozylady», - dedi Býrabai aýdany ákimi apparatynyń basshysy Qasymhan Májikov.
«Adamdar jaýapkershilikti sezinbegendikten osyndai jaǵdai qalyptasty. Meniń oiymsha, ony toqtatýdyń jalǵyz ǵana joly - TJ rejimindegidei blokpost qoiý», - dedi aýdannyń bas sanitar dárigeri Seraly Joldospaev.
