Qazaqstandyq zańger Ulybritaniia, AQSh, Reseidiń tájiribesine súiene otyryp býllingke qarsy qural oilap tapqan. Bul týraly Ortalyq kommýnikatsiialar ortalyǵynda «Ózińdi jáne jaqyndaryńyzdy býlling jáne kiberbýllingten qalai qorǵaýǵa bolady» taqyrybynda ótken brifingte aityldy, dep habarlaidy QazAqparat.
«Býlling pen kiberbýllingke bailanysty nege nazar aýdarýymyz kerek? Birinshiden, psihologiialyq, fizikalyq túrdegi zorlyq-zombylyq siiaqty adam quqyǵynyń óreskel buzylýyna nazar aýdarý qajet. Bul quqyq buzýshylyqtarǵa qatysty qylmystyq jáne ákimshilik jaýapkershilikke tartýǵa bolady. Adamnyń ar-namysyn taptaý, balaǵattaý, zardap shegýshiniń ruqsatynsyz intimdik sýretterin taratý, ózgemen jazysqan habarlamalardy buzyp kirý, ony taratý - osynyń bári kiberbýllingke jatady», - deidi BUU-nyń adam quqyǵy boiynsha sarapshysy Halida Ájiǵulova.
Ol býlling psihologiialyq zorlyq-zombylyq retinde otbasy ishinde bolýy múmkin ekenin de aitty.
«Eger býlling úide jasalsa - ol turmystyq zorlyq-zombylyqqa jatady. Eger ol júieli túrde qaitalanyp otyrsa ata-ana jáne otbasynyń basqa músheleri qylmystyq jaýapkershilikke tartylýy múmkin», - deidi ol.
Ol býlingpen qalai kúresýge bolatynyn aitty.
«Men «Street Law Kazakhstan» áleýmettik jáne ǵylym-bilim berý jobasynyń koordinatorymyn. Biz balalardy býlling, kiberbýllingten qorǵaýmen ainalysamyz. Byltyrdan beri Almatyda osy baǵyt boiynsha sabaq bersek, biyl Qazaqstan boiynsha muǵalim, ádisker, psihologtarǵa onlain sabaq berýdemiz. Men zańger-ǵalym retinde Ulybritaniia, AQSh, Reseidiń tájiribesine súiene otyryp býllingke qarsy qural oilap taptym. Eger ony mektepke engizetin bolsaq qaýipsiz ortany qalyptastyrýǵa kómektesedi. Mysaly, Ulybritaniiada 1 qyrkúiek kúni mektepke balasyn aparǵan ár ata-ana býllingpen kúresý týraly paraqsha alady. Ol jerde býlling, kiberbýlling týraly tolyq aqparat jazylady. Eger bala býlling jasasa, iaǵni áldebir balany balaǵattasa, kemsitse bul jaǵdai balanyń jeke isine elektrondy formatta jazylady. Ol is balanyń búkil oqýshylyq ómirinde saqtalady. Sondyqtan ata-ana balasynyń býller atanǵanyn qalamasa - balasymen jumys istep, tárbiesimen ainalysady. Mundai qural bizdiń eldegi mektepterge de engizilse durys bolady», - deidi ol.
