Jappai tártipsizdikter kezinde bankomattardan jarty milliard teńge urlandy. Al bankterge kelgen jalpy shyǵynnyń kólemi ortasha eseppen 4 milliard teńgege jetti, dep habarlady Sputnik Qazaqstan agenttigi KTK arnasyna silteme jasap.
Almatydaǵy tártipsizdikter kezinde tonalǵan bankter men mikroqarjy uiymdary shyǵyn kólemin áli eseptep bitken joq. Óitkeni keibir bankter tergeýge bailanysty búlingen bólimshelerge kire almai júr.
Qarjy naryǵyn retteý jáne damytý agenttigi ázirge bankterge keltirilgen shyǵyndardyń aldyn ala somasyn jariialady.
Agenttiktiń basqarma bastyǵy Dáýren Nysanbaevtyń aitýynsha, bankomattar men bank bólimsheleriniń basym bóligi Almatyda tonaldy.
"Bankomattardan urlanǵan jarty milliard teńgeden bólek buzylǵan bankomattardyń shyǵyny 1,6 milliard teńgege baǵalanady. Sondai-aq 871 million teńge turatyn tehnika joiyldy. Bank keńseleri de qiratyldy. Onyń shyǵyny - 757 million teńge. Bul soma áli de ózgerýi múmkin. Zalaldyń tolyq qunyn tergeý aiaqtalǵanda jariialaimyz", - deidi Nysanbaev.
Budan bólek, mikroqarjy uiymdary da zardap shekti. Olarǵa kelgen shyǵynnyń kólemi shamamen 653 million teńgeni quraidy.
Jappai tártipsizdikter kezinde buzaqylar kóshe boiynda jáne bank bólimshesiniń ishinde turǵan bankomattardy syndyryp jarty milliard teńgeni qoldy qylǵan. Almatydaǵy filialdarǵa 384 million teńge, Almaty oblysynda 140 million teńgege jáne Qostanai oblysynda 101 million teńgeniń múlki qiraǵan.
Sarapshylardyń aitýynsha, bankomattan aqsha urlaǵandardy tabýǵa bolady. Sebebi árbir banknottyń seriialyq nómiri bar.
"Árbir qaǵaz aqshanyń nómiri bar. Sol boiynsha izdep tabýǵa bolady. Biraq dál qazir osy jumyspen eshkim ainalyspaidy dep oilaimyn. Bankter de bankomatqa salynatyn aqshanyń nómirin jazyp otyrmaityn siiaqty. Oǵan kóp kúsh ketedi. Bul jerde aýdio-video baqylaý quraldary arqyly izdeitin shyǵar", - deidi ekonomist Arman Beisembaev.
