QR Bilim jáne ǵylym ministrligi qyzmetkerleriniń 70 paiyzy qashyqtyqtan jumys isteitin formatqa kóshti. Bul jaiynda vedomstvo basshysy Ashat Aimaǵambetov Facebook paraqshasynda jazdy, dep habarlaidy "Ult aqparat".
«Prezident Qasym-Jomart Toqaevtyń tapsyrmasyna sáikes, QR BǴM qyzmetkerleriniń 70 paiyzy qashyqtyqtan jumys isteitin formatqa kóshti, arasynda eńbek demalysyna shyqqandar da bar. Bul sheshim, eń aldymen, sozylmaly aýrýy bar, jasy zeinetkerlikke taiaǵan jáne úiinde kishkentai balalary bar áriptesterge qatysty. QR BǴM 14 naýryzda qabyldaǵan №108 buiryǵyna sáikes mektep kanikýly kezinde muǵalimderdiń 100 paiyzy jáne qashyqtyqtan oqytý barysynda kolledjder men JOO-nyń oqytýshylary qashyqtyqtan jumys isteýi tiis», - dedi ministr.
Sondai-aq, onyń atap ótýinshe, keshe qosymsha bilim berý, PMPK, KPPK qyzmetkerlerine qatysty qosymsha sheshim qabyldandy. Qazirgi kezeńde olardy aqy tólenetin eńbek demalysyna jiberý usynyldy.
«Ata-analar búldirshinderin aparmaýdy uiǵarǵan toptarda jumys isteitin balabaqsha qyzmetkerlerine de aqyly eńbek demalysyn berý qajet. Sonymen qatar, bilim jáne ǵylym salasyndaǵy basshylardy uiymnyń tynys-tirshiligin qamtamasyz etýmen ainalysatyn mamandardan ózge barlyq qyzmetkerlerin aqyly eńbek demalysyna jiberýge nemese qashyqtyqtan jumys isteý formatyna aýystyrýǵa tapsyrma berdim. Biz úshin azamattarymyzdyń densaýlyǵyn saqtaýdy oilaý jáne infektsiianyń taralý tizbegin toqtatýǵa kúsh salý mańyzdy. Bul rette ózin-ózi oqshaýlaýdy qamtamasyz etý, qoǵamdyq oryndarǵa barmaý óte mańyzdy», - dedi Ashat Aimaǵambetov.
