Uly Dalada jaryq dúnie esigin ashyp, Uly Dalada nebir yqlym zamannan beri ult bolyp, el bolyp qalyptasqan halqymyz tabiǵattyń árbir qubylysynyń qabaǵyna qarap, dúleiimen alysyp, kúngeiimen qýana qaýyshyp kún keshken. Iaǵni, tabiǵattyń tól perzenti bolǵan. Aspandaǵy Kúnniń de, astyndaǵy Jerdiń de qadirin bilgen. Jaratýshynyń adam balasyna bergen osynaý nyǵmetterin qut, bereke dep bilgen. Ony únemdep shashpai tókpei keregine jaratqan. Jaratýshynyń sý, aýa, jer, ósimdik, mal tárizdi nyǵmetterin aialai bilgen. Qyzyǵyn kórgen. Uly Jaratýshy adam peshenesine jazǵan osynaý nyǵmetterdi saqtaýdyń, molaitýdyń qyr-syryna qanyqqan.
Jaratýshy syiǵa bergen bul bailyqtarmen qarym-qatynas jasai bilgen. Aýa, sý, Jer, tórt túlikti sondyqtan da aialaǵan. Osynaý tabiǵat syiyn aialai bilgende ǵana armansyz kún keshetinin uqqan. Bulardy kie tutqan. Ol bailyqtardy ysyraptamaǵan. Kerisinshe kóbeitken.
Sol mol bailyqtyń biri sý edi. Sýsyz ómir tul edi. Sý jańbyr bolyp jaýady. Bulaq bolyp aǵady. Topyraq ony ishedi. Odan órgen ósimdikti mal jeidi. Maldy adam jeidi. Onsyz ómir toqtaidy. Sony túigen dalalyqtar jer, sý, aýa, ósimdik, maldy, jylýdy kie tutty. Adam adam bolý úshin olardyń kózin ashty. Kóbeitti. Jer ana bizdi bulaǵymen emizedi. Sol bulaqtyń kózin ashý - ár pende mindeti.
Ásirese, búgingidei Ulystyń Uly kúni Naýryz kúnderi dalalyqtar tabiǵat ana sútindei sý kózin ashýdy urpaǵyna úlgi etken. Bir bulaqtyń kózin ashsań, ómir atty myń bulaq saltanat qurmaq. Kósegesi kógerip tirlik búrshik atpaq. Sen qadaǵan tal shybyq kúni erteń búrshik atyp máýelemek. Igilikke ainalmaq.
Dana halqymyz sondyqtan kóktem kele bulaq kózin ashqan. Jylý men jer, sý tirlik bastaýy dep bilgen. Tirlik kózi ashylsa, ómir kóshi toqtamaǵan. Sol salttyń arqasynda halyq bar bolǵan. Biz bar bolǵanbyz. Endeshe, ylǵi da bar bolaiyq!
Smaǵul ELÝBAEV
