ۇلى دالادا جارىق دٷنيە ەسٸگٸن اشىپ, ۇلى دالادا نەبٸر ىقلىم زاماننان بەرٸ ۇلت بولىپ, ەل بولىپ قالىپتاسقان حالقىمىز تابيعاتتىڭ ەربٸر قۇبىلىسىنىڭ قاباعىنا قاراپ, دٷلەيٸمەن الىسىپ, كٷنگەيٸمەن قۋانا قاۋىشىپ كٷن كەشكەن. ياعني, تابيعاتتىڭ تٶل پەرزەنتٸ بولعان. اسپانداعى كٷننٸڭ دە, استىنداعى جەردٸڭ دە قادٸرٸن بٸلگەن. جاراتۋشىنىڭ ادام بالاسىنا بەرگەن وسىناۋ نىعمەتتەرٸن قۇت, بەرەكە دەپ بٸلگەن. ونى ٷنەمدەپ شاشپاي تٶكپەي كەرەگٸنە جاراتقان. جاراتۋشىنىڭ سۋ, اۋا, جەر, ٶسٸمدٸك, مال تەرٸزدٸ نىعمەتتەرٸن ايالاي بٸلگەن. قىزىعىن كٶرگەن. ۇلى جاراتۋشى ادام پەشەنەسٸنە جازعان وسىناۋ نىعمەتتەردٸ ساقتاۋدىڭ, مولايتۋدىڭ قىر-سىرىنا قانىققان.
جاراتۋشى سىيعا بەرگەن بۇل بايلىقتارمەن قارىم-قاتىناس جاساي بٸلگەن. اۋا, سۋ, جەر, تٶرت تٷلٸكتٸ سوندىقتان دا ايالاعان. وسىناۋ تابيعات سىيىن ايالاي بٸلگەندە عانا ارمانسىز كٷن كەشەتٸنٸن ۇققان. بۇلاردى كيە تۇتقان. ول بايلىقتاردى ىسىراپتاماعان. كەرٸسٸنشە كٶبەيتكەن.
سول مول بايلىقتىڭ بٸرٸ سۋ ەدٸ. سۋسىز ٶمٸر تۇل ەدٸ. سۋ جاڭبىر بولىپ جاۋادى. بۇلاق بولىپ اعادى. توپىراق ونى ٸشەدٸ. ودان ٶرگەن ٶسٸمدٸكتٸ مال جەيدٸ. مالدى ادام جەيدٸ. ونسىز ٶمٸر توقتايدى. سونى تٷيگەن دالالىقتار جەر, سۋ, اۋا, ٶسٸمدٸك, مالدى, جىلۋدى كيە تۇتتى. ادام ادام بولۋ ٷشٸن ولاردىڭ كٶزٸن اشتى. كٶبەيتتٸ. جەر انا بٸزدٸ بۇلاعىمەن ەمٸزەدٸ. سول بۇلاقتىڭ كٶزٸن اشۋ - ەر پەندە مٸندەتٸ.
ەسٸرەسە, بٷگٸنگٸدەي ۇلىستىڭ ۇلى كٷنٸ ناۋرىز كٷندەرٸ دالالىقتار تابيعات انا سٷتٸندەي سۋ كٶزٸن اشۋدى ۇرپاعىنا ٷلگٸ ەتكەن. بٸر بۇلاقتىڭ كٶزٸن اشساڭ, ٶمٸر اتتى مىڭ بۇلاق سالتانات قۇرماق. كٶسەگەسٸ كٶگەرٸپ تٸرلٸك بٷرشٸك اتپاق. سەن قاداعان تال شىبىق كٷنٸ ەرتەڭ بٷرشٸك اتىپ مەۋەلەمەك. يگٸلٸككە اينالماق.
دانا حالقىمىز سوندىقتان كٶكتەم كەلە بۇلاق كٶزٸن اشقان. جىلۋ مەن جەر, سۋ تٸرلٸك باستاۋى دەپ بٸلگەن. تٸرلٸك كٶزٸ اشىلسا, ٶمٸر كٶشٸ توقتاماعان. سول سالتتىڭ ارقاسىندا حالىق بار بولعان. بٸز بار بولعانبىز. ەندەشە, ىلعي دا بار بولايىق!
سماعۇل ەلۋباەۆ
