Qazaqstannyń Tuńǵysh Prezidenti N.Á.Nazarbaev «Nur Otan» partiiasy tóraǵasynyń ókilettikterin respýblikanyń qazirgi basshysyna berý týraly sheshim qabyldady. N.Nazarbaev partiiany el Prezidenti basqarýy kerektigin qadap aitty.
Laýazymdy tapsyrý Nur Otan partiiasynyń ýstavyna sáikes iske asady.
Saiasatkerler men sarapshylar bileýshi partiianyń tóraǵalyǵyna Memleket basshysy Qasym-Jomart Toqaevtyń Táýelsizdiktiń 30-jyldyǵy qarsańynda kelýiniń simvolikalyq mán-maǵynasy zor ekenin aityp, osylai elimizdiń damýynyń kelesi kezeńiniń dialektikasy qalyptasýda dep pikir bildirýde.
Saiasi keńestiń keńeitilgen otyrysynda Elbasy «Eldiktiń jeti tuǵyry» atty qaǵidany usyndy.
«Bul otyz jyldyq belesti elmen birge ótkergen Elbasy retindegi meniń jas urpaqqa joldar úndeýim dep qabyldańyzdar» - dedi Nursultan Nazarbaev.
Olar:
* Táýelsizdik – kez-kelgen azamat úshin eń qasterli qundylyq.
* Birlik pen kelisim – eldigimizdiń myzǵymas tuǵyry.
* Jer – ata-baba murasy, halyq qazynasy.
* Otbasy men salt-dástúr – qoǵamnyń altyn dińgegi.
* Ulttyq mádeniet – halyqtyń rýhani tiregi.
* Bilim men eńbek – baqýatty ómirdiń kilti.
* Pragmatizm – básekege qabiletti bolýdyń kepili.
«Jerden qasietti eshnárse joq. Qazaq úshin el men jer – tutas uǵym. Tarihymyzdaǵy soǵys ataýlynyń bári el men jerdi qorǵaý úshin bolǵan. Biz Táýelsizdikti jariialai salysymen shekaramyzdy qujat júzinde bekitip alýǵa kúsh jumsadyq. Adamzat tarihynda, tipti qazirgi kezeńde de daýly territoriianyń soǵysqa, qantógiske alyp kelgenin kórip otyrmyz», - degen Elbasy óziniń «óskeleń urpaqty osyndai qaýipten saqtap qalý úshin baryn salǵanyn» aitady. «Endi ata-baba amanatyna adal bolyp, ulan-ǵaiyr jerimizdi qorǵaý, ony bolashaq urpaqqa miras etý – bizdiń ortaq boryshymyz», - dedi Nursultan Nazarbaev.
Atalmysh tujyrymdamanyń ulttyq aýqymy óte keń jáne bul Táýelsizdiktiń myzǵymas qundylyqtaryn qamtityn irgeli qujat deýge de bolady.
Sóz sońynda Elbasy Qazaqstan halqyn Táýelsizdigimizdiń 30 jyldyǵymen quttyqtap, bylai dep ósiet aitty:
“Ardaqty aǵaiyn!
Aldaǵy 30 jyl – eldigimizdi nyǵaitýdyń jańa kezeńi bolary haq.
Ol ár azamat ultymyzdyń bolashaǵy úshin jaýapkershilikti óz moinyna alyp, ony tolyq sezine bilgen kezde júzege asady.
Eldiń eń iri saiasi partiiasy retinde «Nur Otan» osy baǵytta atqarylar isterdiń aldyńǵy shebinde bolýy kerek.
Osyndai igi jumystyń basy-qasynda júrý – bileýshi partiianyń uzaqmerzimdi kóshbasshylyǵynyń kepili.
Endigi kezekte osy mereili kúnge jetkizgen, yrysymyzdy arttyrǵan Jaratqanǵa shúkirshilik etip, erteńge senimdi qadam basý qajet.
Rýhymyzdy qairap, eńsemizdi tiktep, budan da biik asýlarǵa jetý úshin jáne Táýelsiz Qazaqstannyń jarqyn bolashaǵy jolynda tynbai jumys isteýge tiispiz!
Biz kez kelgen synaqtan súrinbei ótip, jeńiske birge jetemiz!
Táýelsizdigimizdiń otyz jyldyq belesi qutty bolsyn!”
Ashat Sadyrbai, jýrnalist
