Foto: The Associated Press/Emilio Morenatti
Májilis depýtaty Aidos Sarym kýlýarda jýrnalisterge Qazaqstannyń BUU rezoliýtsiiasyna qarsy daýys bergenine qatysty pikir bildirdi, dep habarlaidy BAQ.KZ portaly.
Jaqynda Qazaqstan Reseidiń Ýkrainaǵa qarsy soǵysyn toqtatýǵa shaqyrǵan BUU-nyń rezoliýtsiiasyna qarsy daýys bergeni týraly aqparat áleýmettik jelide qyzý talqylandy. Bul Qazaqstan halqy múddesi turǵysynan qabyldanǵan sheshim be? Qalai oilaisyz? – dep surady jýrnalist depýtattan Májilis kýlýarynda.
"Qazaqstan Donbasty, Krymdy, basqany moiyndamaitynyn úzildi-kesildi aitty. Mynany da túsinýimiz kerek. Ýkraina men Resei arasynda keskilesken soǵys júrip jatyr. Ár tarap óziniń múmkindigin arttyrý úshin BUU-nyń tribýnasyn paidalanady. Bul zańdy nárse. Bizdiń másele – ózimizdiń jaǵdaiymyzdy eskere otyryp, diplomatiialyq yrym-joralǵylardy jasaýǵa májbúrmiz. Kóptegen jaǵdaida Qazaqstan qalys qalyp otyrady. Qazaqstandyqtardy osy jaǵyn da durys túsinýge shaqyramyn", - dep aitty depýtat Sarym.
Májilis depýtaty saldary aýyr bolmaitynyn aitty.
"Bizdiń jaǵdaida Qazaqstan Reseidiń de kóńilin, jaǵdaiyn, ondaǵy qoǵamdyq pikirdi eskerip otyrýǵa tiis. «Bul soǵystyń bizge kelgenin qalaisyzdar ma?». Biz de qalamaimyz. Sondyqtan osyndai tirshilik jasaýǵa májbúrmiz. Bul - soǵysty qoldaý emes. Qazaqstan soǵysqa qatysty óziniń málimdemesin birneshe ret jasaǵan. BUU qabyldaǵan barlyq sheshimniń astynda Qazaqstannyń qoly bar. Diplomatiialyq, beibit jolmen sheshý keregin kún saiyn aityp jatyrmyz. Ázirge qolymyzdan keletini osy. Toqaevtyń ornyna kim kelse de, bir aptadan keiin osy saiasatty ustanýǵa májbúr bolady. Bul bizdiń oilap tapqanymyz emes. Ókinishke orai, bul oiynda bizdiń upaiymyz asa keremet emes. Sondyqtan kórpemizge qarap kósilemiz, jaǵdaidy, iaǵni Qazaqstannyń ishki de, syrtqy da jaǵdaiyn eskeremiz", - deidi Aidos Sarym.
Depýtat Qazaqstanǵa 5-10 jyldyq tynyshtyq keregin aitty. Tynyshtyqty paidalanyp, elimiz reformalardy eselep júrgizip, qorǵanys salasyn kúsheitýi qajet.
Eske sala keteiik, Qazaqstan BUU-nyń Reseiden Ýkrainadaǵy basqynshylyq soǵysty toqtatyp, áskerin shyǵarýdy talap etken qararyna qarsy daýys berdi.
Qarar «Ýaqytsha basyp alynǵan Qyrym avtonomiialy respýblikasy men Sevastopol qalasyndaǵy (Ýkraina) adam quqyǵynyń jaǵdaiy» dep atalady. BUU Bas assambleiasy 15 jeltoqsanda qabyldaǵan qujatty 82 el qoldady, 14 el qarsy shyqty, taǵy 80 memleket qalys qaldy.
Qujatqa qarsy daýys bergender qatarynda Qazaqstan men Reseidiń ózinen bólek, Belarýs, Kýba, Nikaragýa, Zimbabve, Iran, Qytai, Soltústik Koreia, Mali, Sýdan, Efiopiia, Siriia, Eriteriia siiaqty memleketter bar.
