QR Parlamenti Májilisiniń depýtaty, «AMANAT» partiiasy fraktsiiasynyń múshesi Samat Musabaev aldaǵy referendýmnyń mán-mańyzy jáne zańnamalar júzinde engiziletin ózgerister týraly oi bólisti, dep habarlaidy QazAqparat.
«Endigide Memleket basshysy qandaida bir oblys, ne respýblikalyq mańyzy bar qala ákimi laýazymyna jalǵyz emes, birneshe kandidatty balamaly negizde usynady. Olardy oblystyq nemese qalalyq máslihat depýtattary tańdaityn bolady. Demek, budan bylai oblys ákimi de sailanady dei alamyz. Is júzinde aimaq basshysy kim bolatynyn jergilikti depýtattar aiqyndaidy», - deidi depýtat.
Sondai-aq, Samat Musabaev Parlament pen máslihattar depýtattary quramynyń jasaqtalýyna qatysty ózgeristerdi de atap ótti.
«Prezidenttiń Senattaǵy kvotasy 15 depýtattan 10-ǵa deiin qysqarady. Májilistiń depýtattyq korpýsynyń 70 paiyzy proportsionaldyq, 30 paiyzy majoritarlyq tásilmen jasaqtalady. Oblystyq máslihattardyń 50 paiyzy majoritarlyq júiemen, 50 paiyzy partiialyq tizimmen, al aýdandyq deńgeide 100 paiyz depýtattar majoritarlyq tásilmen sailanbaq. Onymen qosa, endi Májilis 107 emes 98 depýtattan quralmaq», - dedi ol.
Elimizdegi júrip jatqan osy saiasi reformalardyń arqasynda Májiliske ártúrli kózqarastaǵy azamattardyń kelýine jol ashylyp, saiasi básekelestiktiń artýy men demokratiianyń dami túsetinin aitty.
«Qoldanystaǵy zańnamaǵa sáikes Konstitýtsiiaǵa engiziletin túzetýlerdiń barlyǵyn Parlament qabyldaýy tiis. Alaida, aldaǵy aýqymdy ári mańyzdy ózgerister el bolashaǵyna airyqsha áser etedi. Sol sebepti de, Prezidentimiz Qasym-Jomart Toqaev respýblikalyq referendým ótkizý týraly jarlyqqa qol qoidy. Referendým - jarqyn keleshektiń irgetasyn qalaityn asa mańyzdy shara. Óitkeni, qoǵamda kúrmeýi sheshilmei kele jatqan kúrdeli máseleler tym kóp. Sol sebepti, «Halyq únine qulaq asatyn memleket» tujyrymdamasyn alǵa qoia otyryp, osyndai mańyzdy sheshim qabyldandy dep baǵaladym. Álbette, elimiz zor ózgerister aldynda tur. Sondyqtan, 5 maýsym kúni ár qazaqstandyqty óziniń azamattyq boryshyn oryndaýǵa shaqyramyn. Bul referendým barlyq demokratiialyq qaǵidattarǵa sáikes keledi dep esepteimin», - dep túiindedi Samat Musabaev.
