Qazaqstannyń birinshi, álemniń 23-raketkasy Elena Rybakina Ýimbldon týrnirinde erteń, senbi kúni chempiondyq ataq úshin kortqa shyǵady, dep habarlaidy QazAqparat.
Qazaqstandyq tennisshiniń finaldaǵy qarsylasy – álemniń 2-raketkasy, týnistik Ons Jaber.
Qaisysy utsa da, bul olardyń «Úlken dýlyǵa» dodasyndaǵy alǵashqy titýly bolmaq.
Finalǵa deiin Elena Rybakina bir ǵana sette ese jiberdi, iaǵni shirek finalda aýstraliialyq Aila Tomlianovichpen úsh partiia oinady.
Al Ons Jaber chehiialyq Mariia Boýzkovamen jáne keshe germaniialyq Tatiana Mariiamen úsh settik kezdesý ótkizdi.
Osyǵan deiin qarsylastar hard tósenishinde úsh márte sheberlik baiqasty. Qazaqstandyq tennisshi 2019 jyly Ýhanda ótken jarysta O.Jaberdi utty – 6:1, 6:7 (3:7), 6:2.
Esesine Ons 2021 jyly Dýbaida (7:6 (8:6), 4:6, 6:2) jáne Chikagoda (esep 4:6, 2:3 bolǵan kezde E.Rybakina matchty jalǵastyrýdan bas tartty) jeńiske jetti.
Finaldyq báseke 9 shilde kúni elorda ýaqytymen saǵat 19:00-de bastalady. Matchty tikelei efirde Setanta Qazaqstan telearnasynyń Bee TV sporttyq qosymshasynan kórýge bolady.
Kei býkmekerlik keńseler bul kezdesýde Ons Jaberdi favorit retinde tanyp otyr.
Qazaqstandyq tennisshiniń jeńiske jetý múmkindigi 2.344 koeffitsientimen baǵalansa, qarsylasyniki – 1.698.
Mamandar Elena Rybakinanyń dop berýdegi sheberligin, kógal tósenishinde oinaý onyń oń jambasyna keletindigin basa aitýda.
Eske sala keteiik, budan buryn Elena Rybakinanyń alǵash ret Ýimbldon týrniriniń finalyna shyqqanyn jazǵan bolatynbyz.
Sondai-aq Memleket basshysy Rybakinany jeńisimen quttyqtady.
