Elbasy Nursultan Nazarbaevtyń halyqqa arnaǵan dástúrli Joldaýyn barsha jurt asyǵa kútti. Bul jolǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» taqyrybynda ótken Joldaýda Elbasy halqymyz jetken jetistikterdi saralai kelip, elimizdi jańǵyrtý jónindegi qajetti baǵdarlamalyq bastamalardy jetkizdi.
Iá, tarih úshin qysqa merzim bolsa da, elimiz biik belesterdi baǵyndyryp keledi. Maqsatymyz aiqyn, josparymyz júieli bolǵandyqtan, ozyq eldermen terezemiz teńesti. Ásirese, táýelsizdigimizdi alǵannan beri sport salasy jyldan-jylǵa qaryshtap damyp keledi. Osy Joldaýda da Memleket basshysy buqaralyq sportty damytý, qara domalaq balalar men qarakóz qyzdarymyzdan el namysyn qorǵaityn sportshy shyǵarý, ulttyq sportqa degen qyzyǵýshylyqty arttyryp, jastardy otansúigishtikke, patriotizmge tárbieleý kerektigin basty nazarǵa aldy.
Elbasy óziniń Joldaýynda: «Óńirlik deńgeidegi rezervterdi taýyp, buqaralyq sport pen dene shynyqtyrýdyń qojetimdiligin arttyrý qajet. Úkimet jáne ákimderge kem degende 100 dene shynyqtyrý-saýyqtyrý keshenin salýdy tapsyramyn. Sondai-aq, qoldanystaǵy ásirese mektepterdegi sport ǵimarattaryn tiimdi paidalanyp, dene shynyqtyrýmen ainalysý úshin aýlalardy, parkterdi, saiabaqtardy jabdyqtaý kerek», – dep aitty. Buqaralyq sportqa qoldaý kórsetip otyrsa, rýhty qazaq jurtynan áli talai chempiondar shyǵaryna senimimiz mol. Óskeleń urpaq myqty bolsyn desek, óz eliniń shynaiy patrioty bolý kerek. Sondyqtan, bolashaq jastardy búginnen bastap salaýatty ómir saltyn ustanýǵa tárbieleý qajet. Keleshek urpaǵymyz bilimdi, patriot bolsa, el bolashaǵy da jarqyn bolary anyq.
Iá, shalǵaida júrgen talantty balalarǵa qoldaý kórsetip, qajetti jaǵdai jasai bilsek, ult namysyn tý qylar tulǵalardyń shyǵary sózsiz. Sol kezde sheteldik legionerlerge arqa súiemei, qansha qarjyny jelge ushyrmai, joǵarǵy jetistikterge qol jetkizer edik. Óz sportshylarymyzǵa kóńil bólinbei, kejegemiz keri ketkeni - ketken. Bul máselege bailanysty Qasym-Jomart Toqaev ta syni pikirin jasyrmaǵan-dy.
Qasym-Jomart Kemeluly: "Biz kóbine sheteldik sportshylardy shaqyramyz. Jeńis te ákeler. Biraq bul kórsetkish pe? Joq. Biz qazaq jastary, qazaqstandyq jastar arasynan olimpiada chempiondaryn, álemdik jáne qurlyqtyq chempionattardyń jeńimpazdaryn daiyndaýymyz qajet. Bul úshin biz balalar men jasóspirimder sportyn, dene shynyqtyrýdy, salaýatty ómir saltyn damytýǵa ekpin jasaýǵa tiispiz» , - dep qatań synǵa aldy.
Rasynda, aýyl-aimaqtarda nebir talantty jastarymyz bar. Eń bastysy, olardy izdep taýyp, tárbielep, baǵyttap, qajetti jaǵdai jasai bilý qajet. Sol kezde biz kútken nátije kóp keshikpei óz jemisin beretin bolady.
QR Mádeniet jáne sport ministri Arystanbek Muhamediuly bul bastamaǵa qatysty: "Memleket basshysy Nursultan Nazarbaev el damýy jolynda alǵa qoiǵan mindetterge bailanysty jyl saiyn óz joldaýlaryn jasap keledi. Bul jolǵy Joldaýda týrizm, sport salalaryna qatysty óte qajetti dúnielerdi aitty. Ásirese, halyqy buqaralyq sportqa tartý úshin "óńirlik deńgeidegi rezervterdi taýyp, buqaralyq sport pen deneshynyqtyrýdyń qoljetimdiligin arttyrý qajet" dep atap ótti. Sondai-aq, Úkimetke jáne ákimderge kem degende 100 deneshynyqtyrý-saýyqtyrý keshenin salýdy tapsyrdy. Budan bólek, "qoldanystaǵy, ásirese mektepterdegi sport ǵimarattaryn tiimdi paidalanyp, dene shynyqtyrý men ainalysý úshin aýlalardy, saiabaqtardy jabdyqtaý qajet" dep tapsyrdy. Halyqty salaýatty ómir saltyn ustanýǵa shaqyrǵan Memleket basshysynyń usynystary dál qazirgi sátten bastap qolǵa alynyp, qajetti jumystar atqarylatyn bolady. Kezekti Joldaýda áleýmettik saladan bastap densaýlyq, mekteptegi máseleler, infrastrýktýra sekildi barlyq saladaǵy mańyzdy máseleler kóterildi. Memleket basshysynyń dástúrli Joldaýyn qurmetpen qabyldap, baǵdarǵa alynǵan maqsat-mindetterdi nátijeli iske asyrýǵa úlesimizdi qosatyn bolamyz", - degen bolatyn.
Endeshe, bolashyqty búginnen oilap, buqaralyq sportqa basa mán berip, bilek sybana iske kirisýimiz qajet. Ýaqyt kemesi qatelikterdi keshirmeidi. Eldiktiń tarihy qazirgi sátten bastalady.
.jpeg)