Búginnen bastap Qazaqstannyń birqatar óńirinde jańa karantindik shekteý sharalary engizildi, dep habarlaidy "Ult aqparat".
9 qarashadan bastap Qostanai, Pavlodar jáne Soltústik Qazaqstan oblystarynda karantin sharalary kúsheitildi.
Atap aitsaq, 9 qarashadan bastap Petropavl qalasynyń perimetri boiynsha 5 blokpost qoiyldy. Olar Mamliýtka qalasy, Beskól aýyly, Býlaev qalasy, Solnechnyi shaǵyn aýdany jáne Shahovskoe eldi mekeni baǵyttary boiynsha ornalasady.
Sonymen qatar, Qostanai oblysynda da karantin sharalary qaita kúsheidi. Búgin óńirde 12 sanitarlyq beket ornatyldy.
Sanitarlyq beket ornatylǵan aýmaqtarǵa oblys ákimi Arhimed Muhambetov arnaiy bardy. Onyń aitýynsha, sońǵy kúnderi oblysta epidemiologiialyq ahýal kúrdelene tústi.
Osyǵan bailanysty covid-19 aýrýynyń odan ári taralýyna jol bermeý maqsatynda oblystyq jedel shtab 9 qarashadan bastap 2 apta merzimge karantin sharalaryn qatańdatý týraly sheshim qabyldady. 9 qarasha saǵat 00.00-den bastap óńirde 12 sanitarlyq beket jumysyn bastady.
Pavlodar oblysynyń Bas memlekettik sanitariialyq dárigeriniń 2020 jylǵy 6 qarashadaǵy №13 qaýlysyna sáikes 9 qarashadan bastap Pavlodar qalasyna adamdar sebepsiz kire almaidy.
Qaýlyǵa sáikes Pavlodar qalasyna kire beriste blokpostar qoiylady. Sondai-aq, birqatar uiymdardyń jumys ýaqyty qysqarady. Qaýlynyń tolyq mátinimen myna jerdan tanysýǵa bolady.
