Kemeldik pen keńdik dep jatamyz. Maqsat pen mindet kúlki emes, kórkem bolýy shart dep jatamyz. Mine, osy bir sharafaty mol túsinikterdi keide men ultyma da teńegim keledi. Ult degenimiz – halyqtyń jetilgen, parasaty jetikken túri. Ózin-ózi saqtaýǵa, damytýǵa, qorǵaýǵa, qorlamaýǵa airyqsha den qoia alatyn qabilettiń túri.
Dostaevskii aitqan eken: «Qudailar ultqa bólingende, olar óledi», - deidi. Demek, ultty uiystyratyn – dúnietanym. Al ony azdyratyn, tozdyratyn – alaýyzdyq. Aiaǵy úzeńgiden shyqsa da, tizesi jerge timegen alash jurty azapty ǵumyrynda, uzyna tarihynda basynan nebir dáýir ótkizdi. Ashysyn da, tushysyn da sarqa tatty. Ashysy tusynda jasqanyp, tushysy tusynda mastanyp kórgen emes. Jeńip te kórdi, jeńilip te kórdi. Biraq osyny seziný – saiasi ómirdiń eń bir qiyn sátterinde bizge bir berik rýhani medet bolǵandai.
Búgingi aq ordaly Qazaqstan - keshegi altyn ordalardyń tikelei murageri. Táýelsizdik – yrys, damýdyń kepili. Al tiregi – birlik. Biraq búgin zaman basqa. Qarýdyń ornyna qalam, qalamnyń ornyna kompiýter kelgen zaman. Tehnologiianyń ózi kúnde ózgerip, ósip bara jatyr. Tolqyndy tolqyn qýady, tolqynnan tolqyn týady. Álem asyǵysta. Ómirdiń ózi kúnde ózgerip bara jatyr. Sondyqtan ne ilgeri basasyń, ne keiin ketesiń. Basqa jol joq.
Mynaý saiasat degen termindi bizdiń dáýirimizge deiingi tórtinshi ǵasyrda Aristotel engizgen eken. Ol ony memleketti basqarýdyń óneri dep atapty. Mine, osy jerde bizdiń ainalamyzdaǵy halyqaralyq saiasi ahýaldy, ishki saiasi ahýaldy nemese ultynyń únimen jurtynyń muńyn tamyrshydai tap basyp otyrǵan Memleket basshysy Qasym-Jomart Kemeluly Toqaev ultynyń únine ún qosa, oi tastady.
2019 jyl... «Syndarly qoǵamdyq dialog Qazaqstannyń turaqtylyǵy men órkendeýiniń negizi», - dep oiyn bastady. 2020 jyl... «Jańa jaǵdaidaǵy Qazaqstan – is pen qimyldyń kezeńi» dep uran tastady. 2021 jyly «Halyq birligi jáne júieli reformalar – el órkendeýiniń berik negizi», - dep oiyn jalǵastyrdy. Al 2022 jyldyń naýryzynda «Jańa Qazaqstan – jańarý men jańǵyrý joly», - dep qadap kórsetti. Osydan birneshe kún buryn, 2022 jyly qyrkúiekte «Ádiletti memleket – birtutas ult, berekeli qoǵam», - dep úsh taǵandyq qaǵidatty alǵa tartyp, halqyn ushpaqqa shaqyrdy. Tujyrym – bes joldaýy kýá Memleket basshysy halyq jaǵynda, memleket jaǵynda ekendigin kórsetti.
Tipti, kúni keshe elimizde ótip jatqan álemdik jáne dástúrli dinder basshylarynyń jetinshi sezinde osy tezisin kóterip, ádiletti álem máselesin qozǵady. Rim papasyn qarsy alǵan kezde Memleket basshysy «Siz bizdiń elge adamzattyq betburys kezinde keldińiz», - dep parasatty oiyn jalǵady. Bes joldaýdyń ishinde halqynyń búkil muń-muqtajy atqaryldy. Biraq sonyń ishinde eń sońǵy joldaýdyń ataýynyń ózi kóńilge úlken senim uialatady. «Ádiletti memleket – birtutas ult, berekeli qoǵam». Iaki, ádiletti memlekette turatyn birtutas ult berekeli qoǵamǵa kepil. Árine, joldaýdyń ishinde shoqtyǵy biik nebir sheshimder bar. Sonyń ishinde – halyq qorynan keleshek urpaqtarymyzǵa ashylatyn esepshot. Keshegi alpaýyttar pyshaq ústinen úlestirgen milliondaǵan gektar jer telimi memleketke qaitaryldy. Qańtar oqiǵasy kezinde asa aýyr qylmys jasamaǵandarǵa keshirim.
Sondai-aq, aldaǵy jarty jyl ishinde biliktiń bar tarmaǵy – Prezident, Parlament, Úkimet túgeldei sailaýdyń súzgisinen ótetin boldy. Eń ǵajaby – Memleket basshysy áli prezidenttik ókili bar biligin sailaýǵa salǵaly otyr. Bir qarasań, ataly nar táýekel. Ekinshi jaǵynan, qaýipti qadam. Sheshimi – Memleket basshysy Qasym-Jomart Kemeluly Toqaev astyndaǵy taǵyn emes, halqynyń baiandy baǵyn oilaǵandyǵy dep bilemin. Kúni keshe qolyndaǵy biligin sútti siyrdai qattap saýǵan zamanmen salystyrǵanda. Shákárim qajy aitpaqshy, bul án burynǵy ánnen ózgerek bop shyqpai ma?! Dál solai! Bárekeldi!
Prezidentimizdiń josparlary san salaly. Arman-murattaryn sapaly baspaldaqtarmen ákele jatyr. Árine, munyń bárine ýaqyt kerek. Oilanýǵa ýaqyt kerek. Dei turǵanmen, pysyqtalǵan, qorytyndalǵan dúnielerdiń barlyǵyn júzege asyrýǵa biz múmkindik berýimiz kerek. Bizdiń mindemiz – birtutas sanaly ult bolyp, berekeli qoǵam bolyp, sózinde pátýa, isinde tiianaq bar el basshysyna - Qasym-Jomart Kemeluly Toqaevqa eń igilikti reformalaryn júzege asyrýyna mandat berýimiz kerek.
Bizdiń Prezident - bilimdi de, bilikti, baisaldy basshy. Osynyń barlyǵyn oilai kele, salystyra kele, sol Prezident biliginiń ǵumyryn jeti jylǵa ákelgeni. Birinshiden, jeti jyl, negizi, bul - qazaqta jaqsy san.
Qazaq aitady, «Jetige kelgenshe, jerden taiaq jeisiń». Bul – búldirshinniń aiaq basyp ketý kezeńi. Al esti, sanaly pendege jeti jyl aqyl toltyrý, bar tájiribeni ortaǵa salý, halyqtyń búkil muń-muqtajyna tárk etý, sodan nátije shyǵarý. Mine, osy oidyń barlyǵy Memleket basshysynyń qaperinde dep oilaimyn. Sondyqtan osy sheshimdi halyq bolyp barlyǵy qoldaýda. Sondyqtan bul sheshim túbegeili aqiqat sheshim dep oilaimyn. Sheshimniń erteńi - halqymyzdyń rizyǵy.
Joǵymyzdy bardai etý, barymyzdy dardai etý – elimizge syn dep oilaimyn. Naizanyń ushyn tat basar, shoqparlar shoqqa tastalar, tolaiym zamanǵa da jetermiz. Táýelsizdigimiz baiandy, eldigimiz máńgilik bolǵai! Tarihtyń tar ótkelinen súrindirmei ótkizgen babalar shapaǵaty bizge de tigei! Elimiz aman, jurtymyz tynysh bolsyn, aǵaiyn!
