QR Jazýshylar odaǵy tóraǵasynyń orynbasary, aqyn Aqberen Elgezek Qazaqstandaǵy ádebiettiń damýy týraly pikirin bildirdi, dep habarlaidy QazAqparat.
«Búgingi ádebi protsess burynǵy ýaqyttaǵy úderisterden áldeqaida basqa. Biz búgin túrli aqparattyq tehnologiialar men áleýmettik jeliler ústem quryp turǵan zamanda jańa ádebiet jasap jatyrmyz. Onyń jaqsy jaǵy da, teris jaǵy da bar. Jaqsy jaǵy – qysqa jazylǵan dúnie ǵalamtor arqyly oqyrmanǵa tez jetedi, tez oqylady, tez taralady. Alaida bul jaǵdaida úlken, irgeli, bylaisha aitqanda kitap formasyna ǵana siiatyn shyǵarmalar azǵantai tutynýshy ortanyń nesibesine ǵana ainaldy», - dedi ol Mádeniet jáne sport ministrliginiń alqa otyrysynda.
Óz sózinde spiker burynǵydai sapaly kásibi ádebi taldaýlar azaiǵanyn, syn janry da az-kem toqyraýǵa túsip turǵanyn aitty.
«Qazir tek áleýmettik jelilerde birjaqty aitylatyn pikirler ǵana bar, onyń deńgeii de osynda otyrǵan azamattarǵa belgili dep esepteimin. Degenmen kórkem ádebiet qashanda bolǵan. Adamzat barda ol jasai da beredi. Nebir zulmat dáýirlerde, soǵys jáne ashtyqta da qazaqta ádebiet jasaldy - órkendegen tustary da boldy, tsenzýraǵa ushyraǵan zamandardy da bastan keshirdi. Sonda da tól ádebietimiz qazaqtyń kórkem álemin ulǵaityp otyrdy. Búginde jańa zaman ádebieti jasalý ústinde. Álbette, biz dáýir suranystary men zaman talaptaryna sai ikemdelip otyrmyz. Ádebietke jyl saiyn jańa tolqyn jastardyń kelip jatqany – sonyń aiǵaǵy. Olardyń oilaý paradigmasy, dúnieni sezinýi men jazý stili de bólek, óz aýditoriialary bar. Jańa ádebi liderler qalyptasyp jatyr. Bul - qýanyshty tendentsiia. Árine, úlken býyn men jańa býyn arasyndaǵy moiyndaý-moiyndamaý degen bolǵan, bola beredi de. Bir sózben aitqanda, ádebi protsess eshqashan toqtamaidy», - dedi Aqberen Elgezek.
