11 shilde (keibir derekterde 24 shilde) Shákárim Qudaiberdiuly (1858-1931) ómirge kelgen kúni. Ol qazaqtyń Uly oishyly, filosof, aqyn, kompozitor, aǵartýshysy.
Uly Abaidyń aǵasy Qudaiberdiniń balasy Shákárimdi aǵasy dúnieden ozǵan soń Abai ózi baýyryna basqan. Jeti jasynan óleń jazyp, óz betimen arab, parsy, túrik, orys tilderin igerip, shyǵys, orys klassikteriniń shyǵarmalarynan tanym kókjiegin keńeitedi. Ártúrli óner túrlerin igeredi.
Sh.Qudaiberdiulynyń ádebi murasy asa bai. Ol poeziia, proza, aýdarma, tarih, traktat salasynda jumys istep, Abai dástúrinde demokrattyq-halyqtyq, gýmanistik-halyqtyq baǵyt ustady. Onyń "Úsh anyǵy" talai ǵalymnyń zertteýine arqaý bolǵan tereń filosofiia.
1908 jyldan bastap elden shet ketip, taza shyǵarmashylyq jumyspen shuǵyldanady. "Túrik, qyrǵyz, qazaq hám handar shejiresi", "Musylmandyq sharty kitaby" 1911 jyly Orynborda, "Qazaq ainasy" óleńder jinaǵy, "Qalqaman-Mamyr", "Eńlik-Kebek" poemalary 1912 jyly Semeide basylyp shyǵady.
Orystyń uly jazýshysy Tolstoimen hat alysyp turǵan. 1931 jyly bandalarmen bailanysty degen jalǵan aiyptaýmen keńes qarýly top músheleriniń qolynan atyp óltiriledi. 1988 jyly aqyn aty aqtaldy.
