Qazaqstannyń eks-premer-ministri Serik Ahmetovtiń naqty jaza merzimin bas bostandyǵyn shekteý jazasyna aýystyrý týraly Qaraǵandy oblysy Abai aýdandyq sotynyń qaýlysyna apelliatsiialyq shaǵym túspegendikten, sot sheshimi zańdy kúshine endi, dep habarlaidy QazAqparat.
Prokýratýra Ahmetovti bostandyqqa shyǵarý týraly sheshimmen kelisip, qarsy shaǵym túsirmedi. Sondai-aq prokýrorlar naqty jaza merzimin bas bostandyǵyn shekteý jazasyna aýystyrý máselesi qaralǵan 5 qyrkúiek kúngi sot protsesi barysynda sottalýshy Ahmetovtiń ótinishine de qoldaý bildirgen bolatyn.
21 qyrkúiek kúni tańerteń sot qaýlysy shuǵyl túrde oryndalý úshin Qylmystyq-atqarý júiesi departamentiniń Abai aýdany Qarabas kentinde ornalasqan AK 159/18 koloniiasynyń ákimshiligine tapsyrylady.
Ahmetov 2016 jyldyń 11 maýsymy kúni jaqsy tártibi jáne mekeme qabyrǵasynda tárbielik sharalarǵa belsendi qatysqany úshin jazany óteýdiń jeńildetilgen túrine kóshirilgen bolatyn. 2017 jylǵy 5 qyrkúiekte burynǵy Úkimet basshysyna jazanyń ótelmegen 4 jyl 26 kúni osyndai merzimge bas bostandyǵyn shekteý jazasyna almastyryldy. Serik Ahmetov bul merzimdi turǵylyqty jeri boiynsha óteidi.
Eske salaiyq, 2015 jyldyń 11 jeltoqsanynda Qaraǵandy oblysynyń qylmystyq ister jónindegi mamandandyrylǵan aýdanaralyq soty burynǵy premer-ministr S. Ahmetov pen basqa da tulǵalarǵa qatysty is boiynsha úkim shyǵardy.
Úkimge sáikes, burynǵy S. Ahmetov QR QK-niń 176-babynyń 4-bóliginiń «b» tarmaǵy (senip tapsyrylǵan bóten múlikti ielenip alý nemese ysyrap etý), QR QK-niń 310-babynyń 3-bóligi (kásipkerlik qyzmetke zańsyz qatysý), QR QK-niń 307-babynyń 3-bóligi (qyzmet ókilettigin teris paidalaný), QR QK-niń 310-1-babynyń 3-bóligi (zańdy kásipkerlik qyzmetke kedergi keltirý) boiynsha kináli dep tanyldy. Oǵan 10 jyl merzimge bas bostandyǵynan aiyrý jazasy taǵaiyndaldy, sondai-aq oǵan múlkin tárkileý jáne memlekettik organdarda laýazymdy qyzmet atqarý quqyǵynan 5 jylǵa aiyrý belgilendi. S.Ahmetov sot zalynda qamaýǵa alyndy.
Qaraǵandy oblystyq sotynyń qylmystyq ister boiynsha apelliatsiialyq soty 2016 jyldyń 14 naýryzynda jemqorlyq qylmystyq iske qatysty sotty bolǵan 11 adamnyń jazasyn jeńildetti. Sonyń ishinde Serik Ahmetovtiń jazasy 10 jyldan 8 jylǵa deiin azaityldy.
Qaraǵandy oblysynyń Abai aýdandyq soty 2017 jyldyń 19 qańtarynda Ahmetovke qatysty«QR Táýelsizdiginiń 25 jyldyǵyna orai raqymshylyq jasaý týraly» QR Zańyna sáikes raqymshylyq jasap, onyń jazasynyń ótelmegen tórtten bir bóligin 1 jyl 7 ai 11 kúnge qysqartty.
