Búgin, iaǵni 29 mamyr kúni saǵat 18.00-de «Habar» telearnasynyń tikelei efirinde prezidenttikke úmitkerler arasynda teledebat ótedi.
QR Ortalyq sailaý komissiiasynyń bekitilgen reglamentine sáikes teledebattar men pikirtalastar 3 kezeńge bólingen.
Birinshi kezeńniń taqyryby – «Qazaqstannyń ekonomikalyq damýynyń basymdyqtary». Alǵashqy kezeń eki týrdy qamtidy. Birinshi týrda árbir qatysýshy óziniń sailaý aldyndaǵy baǵdarlamasyn tanystyryp, sóz sóileidi. Ekinshi týrda qatysýshylardyń ózderiniń opponentterine suraq-jaýap túrindegi pikirsaiys sessiiasy qarastyrylǵan. Qatysýshylar eki suraqtan qoiyp, eki suraqqa jaýap bere alady.
Ekinshi kezeńniń taqyryby – «Qazaqstannyń áleýmettik jańǵyrýy». Ekinshi kezeńniń birinshi týrynda qatysýshylar berilgen taqyryp boiynsha sóz sóileidi. Ekinshi týrda júrgizýshiler barlyq qatysýshylarǵa bir suraq qoiady.
Úshinshi kezeńniń taqyryby – «Sailaýshylarǵa sóz arnaý». Úshinshi jáne qorytyndy kezeńde qatysýshylar tikelei sailaýshylarǵa arnap sóz sóileidi. Túsirilim «Qazmedia ortalyǵy» mediakesheninde uiymdastyrylady. Júrgizýshiler: Erlan Igisinov pen Qymbat Dosjan.
