Búgin 9 jeltoqsan talantty jýrnalist Beisen Quranbektiń týǵan kúni, dep habarlaidy madeniportal.kz.
Beisen Quranbek 1971 jyly 9 jeltoqsanda Almaty oblysynda ómirge keldi. 49 jasynda ómirden ozdy. Ol 2013-2017 jyldary "Aitýǵa ońai" áleýmettik-turmystyq tok-shoýyn júrgizdi. 2017 jyly ulttyq arnada "Qareket" baǵdarlamasynyń tizginin ustady.
Belgili jýrnalist Beisen Quranbek 49 jasqa qaraǵan shaǵynda dúnieden ótti.
Beisen Quranbektiń densaýlyǵy syr berip, biraz ýaqyt asqazanyn emdetip jatqany týraly aitylyp júrgen bolatyn.
Talantty jýrnalist Beisen Quranbek kóz jumǵannan keiin, ol týraly kitap jaryq kórdi. Kitap “Bizdiń Beisen” dep ataldy. Jinaqta qazaq eliniń birtýar perzenti, tirisinde aty ańyzǵa ainalǵan telejýrnalistika tarlany – Beisen Abaiuly Quranbektiń dúnieden ótýine bailanysty jazylǵan estelikter, kóńil aitý jedelhattary, aqyndardyń arnaý jyrlary toptastyrylǵan. Jinaq Beisen Quranbekti qurmetpen eske alýshy qalyń kópshilikke arnalǵan.
Kitapty qurastyrýshylar: Esbolat Aidabosyn, Rishad Turǵanbai, Arai Júndibaeva, Aqjeleń Rahaddin, Jansaia Shyńǵyshan.
Odan bólek, Sanjar Kerimbai jáne Abzal Quspan shyǵarǵan "Beisen jáne bolmys" kitaby da qalyń qazaqtyń kóńilinen shyqqan.
Beisen Quranbek qaitys bolǵannan keiin el arasynda onyń sońǵy jazbasy keń tarap ketti.
"Bilý - bólek, túsiný - basqa. Jyl basynan bergi ishki arpalysqa toly kúnderimde, uiqysyz túnderimde úsh nárseni tereńirek túsindim... Birinshi, Ustazym jii aitatyn "bul ómirde aqshadan da, bilikten de qudiretti dúnie bar. Ol- niettiń, tilektiń, batanyń kúshi" degen sózdiń ras ekenin. Ekinshi, halqymyzdyń "basty bailyq - densaýlyq" dep bir aýyz sózben aita salǵan danalyǵyna bas idim. Uiqy tynysh, tábetiń jaqsy bop, erteńgisin esh jeriń aýyrmai oianýdyń ózi jarty baqyt ekenin uqtym. Úshinshiden, babalarymyz qaldyrǵan "Bailyq - qolǵa ustaǵan muz, Baqyt - basqa qonǵan qus, Bala - artta qalar iz, bul ómirdiń qyzyǵy - Siz ben Biz" degen sóziniń tutas ómirlik filosofiia ekenin, ómirdiń máni de, sáni de syilastyqta ekenin ár kletkammen sezindim", - dep jazdy telejúrgizýshi sońǵy jazbasynda.
