Búgin - Memleket jáne qoǵam qairatkeri, Qazaqstannyń halyq jazýshysy Oljas Súleimenov pen Qazaqstannyń áigili estrada ánshisi, kompozitor Batyrhan Shúkenovtiń týǵan kúni.
Dál osy kúni TMD kóleminde tanymal bolǵan asa daryndy mýzykant, estrada ánshisi Batyrhan Shúkenov dúniege kelgen.
Ol Qyzylorda oblysynda týǵan. Qurmanǵazy atyndaǵy Almaty konservatoriiasyn bitirgen.
1982 jyldan Roza Rymbaevany súiemeldeitin «Arai» tobyna kirdi. 1987 jyly «Almaty» tobyn qurady.
Keiinnen ol «Almaty-Stýdio» toby bolyp qaita quryldy. 1989 jyly óziniń ataqty «Djýliia» dep atalatyn hityn jazdy. Osy jyly «A-Stýdio» Alla Pýgachevanyń «Rojdestvolyq keshter» ásh keshine qatysqannan keiin ansambl ataǵy burynǵy Sovet odaǵy aýmaǵynda tanymal boldy. Ánshi 2002 jyly Qazaqstanǵa oralyp, óziniń alǵashqy «Otan ana» atty jeke albomyn shyǵardy. 2007 jyly QR Prezidenti Nursultan Nazarbaevtyń mádeniet jónindegi keńesshisi boldy. 2009 jyly IýNISEF erikti elshisi, 2010 jyly Almatydaǵy Qaiyrymdylyq baly komitetiniń qurmetti múshesi boldy.
Batyrhan Shúkenov 53 jasqa qaraǵan jasynda Máskeý qalasynda júrek talmasynan qaitys boldy. Marqum Almatyda jerlendi.
Sonymen qatar, memleket jáne qoǵam qairatkeri, Qazaqstannyń halyq jazýshysy Oljas Súleimenov dúniege keldi.
Almaty qalasynda týǵan. Qazaq memlekettik ýniversitetiniń geografiia fakýltetin bitirip, M.Gorkii atyndaǵy Ádebiet institýtynda oqyǵan.
«Kazahstanskaia pravda» gazeti redaktsiiasynyń bólim meńgerýshisi, «Qazaqfilm» kinostýdiiasy stsenarii-redaktsiialyq alqasynyń bas redaktory, Qazaqstan Jazýshylar odaǵynyń hatshysy, Qazaq SSR Kinematografiia jónindegi memlekettik komitetiniń tóraǵasy, QR Joǵarǵy Keńesiniń depýtaty, Qazaqstannyń Italiiadaǵy Tótenshe jáne Ókiletti Elshisi qyzmetterin atqarǵan. Óz týyndylaryn orys tilinde jazady. Óleńderi men poemalarynyń alǵashqy jinaǵy 1961 jyly «Arǵymaqtar» degen atpen jaryq kórgen. Onyń stsenariii boiynsha «Atameken», «Kógildir marshrýt», «Qys - qolaisyz maýsym», t.b. filmder túsirilgen. «Az i Ia», «Jazý tili» atty til bilimine qatysty zertteýleri, «Nurly túnder», «Meshin jyly», «Kóńil kókjiegi», «Ár kún - araily tań», «Aq dariia aspany», «Jumyr juldyz», «Shapaǵatty shaq», «Atameken», t.b. jinaqtary shyqqan. I dárejeli «Barys», «Otan», Eńbek Qyzyl Tý, «Qurmet belgisi», Qazan revoliýtsiiasy ordenderimen, medaldarmen marapattalǵan.
Iadrolyq synaqqa qarsy «Semei-Nevada» qozǵalysynyń kóshbasshysy, Qazaq SSR-iniń Abai atyndaǵy Memlekettik syilyǵynyń, Qazaqstan komsomoly, BLKJO syilyǵynyń laýreaty, Tatarstan Respýblikasynyń Sh.Marjani atyndaǵy Tarih institýtynyń qurmetti doktory. Qazaqstannyń IýNESKO janyndaǵy Turaqty ókili boldy.
