Býdapesht qalasynda Abaidyń 175 jyldyǵy atap ótildi, dep habarlaidy QR Syrtqy ister ministrliginiń baspasóz qyzmeti.
Býdapeshtte Qazaqstan Respýblikasynyń Elshiligi QR Ulttyq akademiialyq kitaphanasy delegatsiiasynyń qatysýymen qazaq aqyny Abaidyń 175 jyldyq mereitoiyn merekeleý aiasynda dóńgelek ústel ótkizdi. Shara barysynda «Álem tanyǵan Abai» kitap-illiýstrativti kórmesi men «Abai álemi» fotokórmesi uiymdastyryldy.
Majarstan men Qazaqstannyń shyǵarmashylyq ziialy qaýymynyń, qoǵamdyq-saiasi, ǵylymi jáne mádeni ortasynyń ókilderi, Qazaqstan Jazýshylar odaǵynyń tóraǵasy bastaǵan abaitanýshylar, qazaq diasporasy, sondai-aq qazaq tilin, mádenieti men salt-dástúrin úirenip júrgen majarlyq stýdentter qatysqan is-shara Túrkitildes memleketter yntymaqtastyǵy keńesi Ókildiginiń ǵimaratynda ótti.
Qazaqstannyń Majarstandaǵy Elshisi Jánibek Ábdrashov Qazaqstan men Majarstan arasynda saiasi-ekonomikalyq qarym-qatynastar ǵana damyp qoimai, sonymen qatar mádeni-gýmanitarlyq yntymaqtastyq ta qarqyndy ilgerilep kele jatqanyn, atap aitqanda Býdapeshtte Abaidyń eskertkishi bar ekenin atap ótti. Majar tarapynan Majarstan Premer-ministriniń keńesshisi, majarlyq pen-klýb prezidenti G.Sioch sóz alyp, álemdik mádeni muraǵa úlesin qosqan Abaidyń eńbeginiń tereń pálsapalyq oilaryna toqtaldy. Sonymen qatar Qazaqstan men Majarstan arasynda ekijaqty mádeni-gýmanitarlyq qarym-qatynastardyń damýyna joǵary baǵa berdi.
Is-shara barysynda majar tilinde M.Áýezovtiń «Abai joly» kitabynyń tusaýkeseri boldy. Is-sharadan keiin Býdapesht qalasynda ortalyq parktegi Astana kóshesinde Abai Qunanbaiulynyń eskertkishine gúl shoǵyn qoiý rásimi boldy. Qazaq diasporasy, sondai-aq qazaqstandyq jáne majarlyq stýdentter Abaidyń óleńderi qara sózderin oqyp, ánderin oryndady.
