Briýsselde Qazaqstan-Eýropa yntymaqtastyǵynyń jańa belesteri talqylandy, dep habarlaidy "Ult aqparat" QR Syrtqy ister ministrliginiń baspasóz qyzmetine silteme jasap.
Qazaqstannyń EO janyndaǵy ókili, Elshi Marǵulan Baimuhan «Eýropalyq qatynastar» salasynda mamandar daiarlaý jónindegi jetekshi joǵary oqý ornynyń basshysy, «Eýropa kolledjiniń» rektory, Eýropalyq Odaqtyń burynǵy Syrtqy ister jáne qaýipsizdik saiasaty jónindegi Joǵarǵy ókili jáne Eýropalyq Komissiianyń Vitse-prezidenti Federika Mogerinimen Qazaqstan-Eýropalyq yntymaqtastyq máselelerin, sondai-aq «Eýropalyq qatynastar» salasynda mamandar daiarlaý múmkindikterin talqylady.
F.Mogerinidiń pikirinshe, Qazaqstan men EO tiimdi seriktestik qurýǵa umtylatyn ekijaqty múddege negizdelgen senimdi dialog qura aldy.
F. Mogerinidiń QR-EO qarym-qatynastaryn damytýǵa qosqan úlesi erekshe ekenin atap ótken jón. EO syrtqy saiasi vedomstvosynyń basshysy retinde ol Qazaqstan men Eýropalyq Odaq arasyndaǵy Keńeitilgen áriptestik pen yntymaqtastyq týraly kelisimdi talqylaýǵa qatysty jáne oǵan qol qoidy. Bul kelisim óńirdegi osy ispettes alǵashqy qujat bolyp tabylady. Búgingi tańda Kelisim Qazaqstan men EO arasyndaǵy yntymaqtastyqty jańa deńgeige shyǵaryp, ekijaqty qatynastardyń keń aýqymyn qamtidy.
Sondai-aq, 2019 jyly EO-Ortalyq Aziia formatyndaǵy qatynastarǵa jańa serpin bergen, Eýropalyq Odaqtyń Ortalyq Aziia boiynsha jańa Strategiiasy qabyldandy.
Kezdesý barysynda Qazaqstandaǵy saiasi jáne ekonomikalyq reformalar, QR jáne EO aýmaǵyndaǵy vaktsinalaý úrdisiniń erekshelikteri, Qazaqstandyq «QazVac» vaktsinasyn óndirý jáne paidalaný máseleleri talqylandy.
Taraptar iadrolyq qarýǵa qarsy qozǵalysty ilgeriletý jáne jańa halyqaralyq bastamaǵa – iadrolyq qaýipsizdik pen iadrolyq qarýdan azat álem úshin Jahandyq Kóshbasshylar Aliansyn qurýǵa erekshe toqtaldy.
BUU joǵary deńgeidegi tobynyń teń tóraǵasy jáne iadrolyq qarýdy taratpaý máselelerimen belsendi ainalysqan burynǵy parlamentarii retinde F.Mogerini bastamaǵa qyzyǵýshylyq bildirip, osy baǵyttaǵy óz tájiribesimen bólisti.
Taraptar qazaqstandyq joǵary oqý oryndary, sarapshylar qoǵamdastyǵy jáne «Eýropa kolledji» arasynda jemisti yntymaqtastyq ornatý jáne birlesken bilim berý jobalaryn iske asyrý múmkindigin egjei-tegjeili zerdeleýge ýaǵdalasty.
Anyqtama retinde: «Eýropa kolledji» 1948 jyly Briýgge (Belgiia) ashyldy. Eýropalyq qatynastar salasyndaǵy magistrlerdi daiyndaityn asa bedeldi joǵary oqý orny bolyp tabylady. Qazirgi ýaqytta bul JOO-da 50-den astam eldiń stýdentteri bilim alady. Stýdentter eýropalyq quqyq, eýropalyq ekonomikalyq jáne saiasi zertteýlerdi oqidy. «Eýropa kolledji» eýropalyq institýttardyń bolashaq qyzmetkerlerin daiarlaýdyń negizgi ortalyǵy retinde tanymal jáne Eýropa elderi jáne ózge de elderiniń saiasi elitalary ókilderiniń bilim ordasy bolyp tabylady.
