Niýrnberg sotynda jaýap berip turǵan Gitlerdiń serigi German Gering. Germaniia, Niýrnberg qalasy, 21 qarasha 1945 jyl
Ulybritaniianyń burynǵy premer-ministrleri Gordon Braýn men Djon Meidjor jáne eldiń taǵy da basqa saiasatkerleri, zańgerleri, ǵalymdary men qoǵam qairatkerleri Ýkrainaǵa basqynshylyq jasaýyna bailanysty Resei prezidenti Vladimir Pýtin men onyń ainalasyndaǵylardyń is-áreketterin zerttep, tergeý úshin jańa halyqaralyq tribýnal qurýdy usyndy, dep habarlaidy Azattyq.
Ekinshi dúniejúzilik soǵystan keiin natsistik áskeri qylmyskerlerdi sottaý úshin uiymdastyrylǵan Niýrnberg tribýnaly úlgisimen halyqaralyq sot organyn qurý týraly petitsiiaǵa 140 adam avtor bolǵan, oǵan 780 myńnan astam adam qol qoiǵan. Qazir internette ashyq turǵan petitsiiaǵa álemniń kez kelgen azamaty qol qoia alady.
Halyqaralyq qylmystyq sot qazirdiń ózinde Pýtinniń Ýkrainaǵa basqynshylyq áreketin zerttep jatyr, biraq Bi-bi-sidiń aitýyna qaraǵanda onyń múmkindigi shekteýli: Birikken ulttar uiymy qaýipsizdik keńesiniń sanktsiiasynsyz qylmystyq jaýapqa tarta almaidy, al qaýipsizdik keńesiniń sheshimine Resei veto qoia alady.
Britaniia saiasatkerleri ózderi usynǵan tribýnaldy qalai jumys istetkisi keletini ázirge belgisiz. Niýrnberg tribýnaly Germaniia jeńilgen soń qurylǵan.
Buǵan deiin AQSh prezidenti Djo Baiden Pýtindi "áskeri qylmysker" dep ataǵan edi. Gordon Braýn bul pikirmen kelisedi jáne "Resei beibit halyqtyń tóbesinen bomba tastap jatyr, onysy – áskeri qylmys" dep sanaidy. Ýkrainada soǵys bastalǵaly 3 aptada kóptegen úi men azamattyq nysandarǵa snariad túsip, júzdegen beibit adam qaza bolǵan edi. Resei qorǵanys ministrligi "tek qana áskeri nysandardy attyq, Ýkraina áskeri beibit adamdardy qalqan qylyp otyr" degen ýáj aitady.
Britaniianyń burynǵy premerleriniń taǵy biri Devid Kemeron Polshaǵa qashyp kelgen Ýkraina bosqyndaryna gýmanitarlyq kómek apara jatqanyn áleýmettik jelige jazdy.
Britaniianyń qazirgi premeri Boris Djonson senbi kúni konseravtivti partiia aktiviniń aldynda sóilegende, tipti Resei agressiiasy aiaqtalǵan kúnde de Vladimir Pýtinge yqylas bildirýdiń keregi joq dep málimdedi. Djonsonnyń sózinshe, 2014 jyly Resei Qyrymdy anneksiialaǵanda Batys reaktsiiasynyń álsiz bolǵany - Pýtinniń jańa agressiiasyna jol ashqan. Boris Djonson Resei prezidenti jýyq mańda qyzmetinen kete qoimaidy dep esepteidi.
Ýkrainaǵa basqynshylyq bastalǵaly Britaniia Máskeý áreketine qatań ustanymda otyr. Ýkrainaǵa qarý berip, Londonda buryn-sońdy turǵan Resei biznesmenderine qatań sanktsiia saldy. Alaida bilik opponentteri bul áreketter jetkiliksiz dep sanaidy.
