Britaniialyq biznesmender Qazaqstandaǵy geologiialyq barlaý jáne jańa ken oryndaryn igerýge investitsiia quiýǵa daiyn. Batys Aýstraliia men Kanadada sátti júzege asyryp kele jatqan jáne bizdiń memleket qoldanysqa engizgen geologiialyq barlaý boiynsha álemdik tájiribe Tumandy Albiondaǵy investorlardyń nazaryn aýdardy, dep habarlaidy «Roadshow London 2020» sharasyna qatysqan QazAqparat.
«Jer qoinaýy jáne jer qoinaýyn paidalaný týraly» QR jańa kodeksindegi mańyzdy ózgerister shaǵyn iýniorlyq kompaniialar úshin sony múmkindikterge jol ashyp otyr. Búginde geologiialyq barlaý úshin 460 myń sharshy shaqyrym bólinip, 600-ge jýyq litsenziia berildi. Oǵan degen suranys, ásirese, britaniialyq kompaniialar arasynda joǵary.
Qazaqstannyń Ulybritaniiadaǵy elshiligi uiymdastyrǵan «Roadshow London 2020» sharasyna britaniialyq «Strategy International» uiymynyń atqarýshy tóraǵasy Piter O’Kein, «Taý-Ken Samuryq» ulttyq taý-ken kompaniiasy» AQ basqarmasynyń tóraǵasy Qanat Qudaibergenov, Ulybritaniia halyqaralyq saýda ministrliginiń ókili Roz Land, «Astana» halyqaralyq qarjy ortalyǵynyń (AHQO birjasy, AIX) qarjy rynoktaryn damytý boiynsha jetekshisi Timýr Abýshkin, sondai-aq taý-ken óndirisi salasyndaǵy jetekshi sheteldik mamandar qatysty.
Qazaqstan Respýblikasy indýstriia jáne infraqurylymdyq damý vitse-ministri Rýslan Báimishevtiń aitýynsha, b úginde Qazaqstanda jańa ken oryndaryn ashýǵa óz septigin tigizgisi keletin shaǵyn iýniorlyq kompaniialar shash etekten.
«Olardyń bizdiń elimizde jumys isteýge degen nieti zor. Meniń oiymsha, osyndai sharalar sol mekemelermen júzbe-júz kezdesýge mol múmkindik beredi», - dedi.
Britaniialyqtar bolsa, taý-ken ónerkásibiniń investitsiialyq jáne innovatsiialyq áleýetin arttyrý úshin Qazaqstanda kóptegen mańyzdy bastamalar qolǵa alynyp jatqanyna qýanyshty.
«Menińshe, Qazaqstannyń halyqaralyq investorlar úshin tartymdylyǵy artyp keledi. Taý-ken sektoryndaǵy jańa kodeks, jýyq arada qabyldanǵaly jatqan jańa ekologiialyq kodeks, paidaly qazbalar qory boiynsha halyqaralyq standarttar komitetiniń qoldanysy Qazaqstanda biznes júrgizýge qolaily jaǵdai týǵyzýda», – dedi Ulybritaniia halyqaralyq saýda ministrliginiń ókili Roz Land.
Úkimettik delegatsiia jáne qazaqstandyq kompaniialar budan keiin Kanadada ótetin jahandyq kórmege jol tartpaq. Jyl saiynǵy sharada Qazaqstan kúni uiymdastyrylyp, «Jer qoinaýy jáne jer qoinaýyn paidalaný týraly» jańa kodekstegi ózgerister jáne alǵashqy nátijeler týraly taǵy da aitylady.
