Ulybritaniianyń birneshe aýdandary jaqyndap kele jatqan «Arven» daýyly saldarynan qaýiptiń qyzyl (eń joǵary) deńgeiin jariialady. Kei jerlerde jeldiń jyldamdyǵy saǵatyna 160 shaqyrymǵa jetýi yqtimal, dep habarlaidy QazAqparat BBC-ge silteme jasap.
Tabiǵi apat osy demalys kúnderi negizinen Angliia men Shotlandiianyń soltústik-shyǵysynda bolady dep kútilýde. Bilik bul aýdandardyń turǵyndarynan aldaǵy kúnderge josparlanǵan saparlaryn keiinge qaldyrýdy, sondai-aq qarttar men kórshilerge erekshe kóńil bólýdi suraidy. Jaǵalaýdaǵy qalalarda arnaiy qaýipsizdik sharalaryn qoldaný usynyldy.
Meteorologiialyq qyzmet ókiliniń aitýynsha, ondaǵy tolqyndar 9-10 metrge deiin jetýi múmkin, sondyqtan teńiz jaǵasynda serýendeýdi keiinge qaldyrý kerek. Ortalyq Angliiada qyzǵylt sary (ortasha) qaýiptilik reitingi bar. Angliia, Ýels jáne Soltústik Irlandiianyń ońtústik-batysynda – sary (eń tómengi). Degenmen, sinoptikter Birikken Koroldikte kólik qozǵalysynyń toqtaýy, elektr qýatynyń úzilýi, telefon jáne uialy bailanystyń isten shyǵýy múmkin ekendigin eskertedi. Aldaǵy demalys kúnderi eldiń kóptegen jerlerinde Rojdestvolyq festivalder men bazarlar toqtatyldy. Aýa temperatýrasy da jyldyń osy ýaqytynda ádettegiden sýyq, iaǵni túnde nólden tómen, kúndiz Tselsii boiynsha nebári 10 gradýsqa taiaý bolmaq
Bul biyl Arven ataýyna ie bolǵan daýyl – Ulybritaniiadaǵy alǵashqysy. Ádette ataýlar belgili bir joiqyn kúshtiń tsiklondaryna beriledi.
