Britaniia poeziia aýdarma ortalyǵynda zamanaýi qazaq poeziiasyn saýatty aýdarý boiynsha seminarlarǵa qatysyp jatyr, dep habaraidy "Ult aqparat".
Aǵylshyn tildi aýditoriiany qazaq poeziiasymen jáne mádenietimen tanystyrýǵa baǵyttalǵan biregei jobany uiymdastyrýǵa Qazaqstannyń Ulybritaniiadaǵy Elshiligi jáne Qazaqstannyń Ulttyq aýdarma biýrosy atsalysqan.
Bir ai boiy ótetin alty seminar aiasynda britaniialyq aqyndar, aýdarmashylar men poeziia súier qaýym Oljas Súleimenov, Gúlnar Salyqbai, Temirhan Medetbek, Aqberen Elgezek, Tanakóz Tolqynqyzy jáne Erlan Júnis siiaqty tanymal qazaqstandyq aqyndardyń óleńderiniń aǵylshyn tilindegi jetildirilgen nusqalaryn jasaý boiynsha jumys jasamaq. Qazaqstandyq aýdarmashy Ásiia Isemberdieva britaniialyq mamandarǵa óleńderdiń qazaq tilinen aǵylshyn tiline sózbe-sóz aýdarmalaryn usynýda. Sharaǵa ataqty britaniialyq aqyndar Djon Stoýn men Liz Berri moderator retinde qatysyp jatyr.
Poeziia aýdarma ortalyǵynyń seminarlarynda qazaqstandyq avtorlardyń ómirbaiandaryna, elimizdiń mentaliteti men mádeni erekshelikterine, ádebi dástúrlerimizge úlken mán beriledi. Munyń bári aýdarmalardy meilinshe túpnusqaǵa jaqyn etip tárjimalaýǵa jáne aǵylshyn tilinde áýezdi estilýine yqpal etpek.
Birinshi seminar qazaqtyń kórnekti aqyny, ádebiettanýshy, saiasatker jáne antiiadrolyq qozǵalystyń belsendisi Oljas Súleimenovtiń shyǵarmashylyǵyna arnaldy. Onyń «Qumyraǵa quiylǵan kez-kelgen ylǵal» óleńi máni men maǵynasy, sondai-aq týyndy dúniege kelgen jaǵdailarǵa qarai taldaýdan ótti.
Seminardyń qorytyndy ónimi Oljas Súleimenovtyń aýdarylǵan óleńi túrinde Poeziia aýdarma ortalyǵynyń saitynan tabýǵa bolady. Oǵan qosa sait qoldanýshylary aldaǵy seminarlarǵa onlain qatysý úshin tirkele alady.
Poeziia aýdarma ortalyǵyn 2004 jyly britaniialyq aqyn jáne aýdarmashy Sara Magýair qurǵan. Uiymnyń maqsaty aǵylshyntildi aýditoriiany álemniń jetekshi aqyndarymen tanystyrý, sondai-aq Ulybritaniiadaǵy mádeni áralýandylyqty damytý.
Aita ketý kerek sharaǵa moderatorlyq etýshiler álemge aty shyqqan shyǵarmashylyq ókilderi. Máselen, Djon Stoýn óziniń «Qoldan jasalǵan dúnieler mektebi» (School of Forgery) atty debiýttik óleńder jinaǵymen belgili. Ol sondai-aq «Jaman jigit Katýll» - ejelgi Rim aqyny Gai Valerii Katýlldyń eńbekterin jańasha aýdarǵan zamanaýi avtor retinde tanymal. Bul týyndy «The Guardian» basylymynyń nusqasy boiynsha 2018 jyldyń eń úzdik 10 poetikalyq antologiiasynyń tizimine engen.
Liz Berri bolsa, eń úzdik óleńi úshin 2018 jylǵy «Forward Prize for Poetry» syilyǵynyń iegeri atanǵan. Onyń alǵashqy «Qara el» (Black Country) jyr jinaǵyn Poeziia qoǵamy joǵary baǵalaǵan. Berri Somerset Moem syilyǵyn, Djeffri Faber memorialdy syilyǵyn jáne 2014 jyly eń jaqsy debiýttik óleńder jinaǵy úshin «Forward Prize for Poetry» syilyǵyn iemdengen.
