Tálipterden úreilengen myńdaǵan aýǵan Kabýl áýejaiyna aǵylyp, kisi keptelisi kezinde jeti adam mert boldy. Bul týraly jeksenbi, 22 tamyz kúni Ulybritaniia áskeri habarlady, dep jazady Azattyq.
Áýejai túbindegi dúrbeleńdi tálipterdiń aspanǵa qarata oq jaýdyrýy odan ári ýshyqtyrǵan. Qýys jerge tyǵyzdalǵan adamdar bir jaqtan ekinshi jaqqa kenet aǵylyp, tolqynǵa ilese almaǵandar jaraqattanyp jatyr.
"Oqiǵa ornyndaǵy jaǵdai asa syndarly bolyp tur, biraq biz ony meilinshe qaýipsiz etýge tyrysyp jatyrmyz" dedi Ulybritaniia qorǵanys ministrligi baspasóz habarlamasynda.
Dúisenbi, 16 tamyz kúni myńdaǵan aýǵan Kabýl áýejaiynyń ushý alańyna shyǵyp ketip, ushaqtardyń áýege kóterilýin tejegen. Keibiri amerikalyq júk ushaǵynyń dóńgelegine jabysyp, ushaq áýege kóterilgende jerge qulap opat boldy.
15 tamyz kúni aýǵan aýdandarynyń basym bóligin jaýlap alǵan "Taliban" (Qazaqstanda terroristik uiym dep tanylǵan) Kabýlge kirip, Aýǵanstan biligin óz qolyna alǵanyn málimdedi. Batys elderi óz dipókildikteri men olarǵa qyzmet etken aýǵan azamattaryn evakýatsiialaýǵa kóship, Kabýldegi halyqaralyq áýejai evakýatsiia ortalyǵyna ainaldy. AQSh azamattardy elden alyp shyǵý operatsiiasyn júzege asyrý úshin Kabýlge myńdaǵan sarbaz jumsady.
Áýejai túbindegi dúrbeleń men beiberekettiń saldarynan qansha adam opat bolǵanyn dál aitý qiyn.
