QR Aýyl sharýashylyǵy ministrliginde Nitsyk Petrov pen Erlan Nurǵalievti (qaitys bolǵannan keiin) III dárejeli "Barys" ordenimen marapattaý rásimi ótti, dep habarlaidy "Ult aqparat" QR AShM Orman sharýashylyǵy jáne janýarlar dúniesi komitetiniń Facebook-tegi paraqshasyna silteme jasap.
Qazaqstan Respýblikasy Prezidentiniń 2019 jylǵy 31 qańtardaǵy № 830 Jarlyǵymen Nitsyk Petrov Alekseevich pen Nurǵaliev Erlan Balǵabekulyn (qaitys bolǵannan soń) Qyzmettik boryshyn atqarý ústinde kórsetken erjúrektigi men janqiiarlyǵy úshin III dárejeli "Barys" ordenimen marapattaldy.
Ministrlik atynan nagradany Aýyl sharýashylyǵy vitse-ministri Nysanbaev Erlan Nuralyuly inspektor Nurǵaliev Erlannyń ákesine jáne Nitsyk Petrge tabystady.
E. Nysanbaev memlekettik nagradalardy tabys ete otyryp, bul oqiǵa búkil el turǵyndaryn kúizeltip, tabiǵat qorǵaýshylar men qarapaiym halyq arasynda rezonans týdyrǵanyn atap ótti.
«Tájiribeli jáne kásibi mamandardyń biriniń mezgilsiz qaitys bolýy qazaqstandyq tabiǵattyń brakonerlik pen qara naryq aldynda qorǵalmaǵanyn kórsetti.
Óz tarapynan ministrlik aýyr, ekstremaldy-klimattyq jaǵdailarda jumys isteitin inspektorlardy qorǵaýdy zańnamalyq deńgeide kúsheitýge qol jetkizetin bolady.
Bizdiń tabiǵatty qorǵaýǵa barlyq memlekettik organdar men jurtshylyq múddeli bolýy tiis. Erlan Nurǵalievtiń is-áreketi bolashaq urpaq úshin erlik pen patriotizmniń úlgisi retinde máńgi este qalady», delingen habarlamada.
Eske sala keteiik, 2019 jyldyń 13 qańtarynda Qaraǵandy oblysy Nura aýdanynda "Ohotzooprom ÓB" RMQK inspektory Nurǵaliev Erlan sirek kezdesetin jáne joq bolyp ketý qaýpi tóngen jabaiy tuiaqtylar men aqbókenderdi qorǵaý boiynsha is-sharalardy júrgizý barysynda brakonerlerdiӊ qolynan qaza tapqan bolatyn.
