Atyraý, Mańǵystaý jáne Batys Qazaqstan oblystarynyń sý aidyndarynda eki aiǵa sozylǵan «Bekire-2022» balyq qorǵaý aktsiiasy aiaqtaldy. Brakonerlerden 21 tonna balyq tárkilenip, 19,7 mln teńge aiyppul salyndy, dep habarlaidy QazAqparat.
Jaiyq-Kaspii oblysaralyq basseindik balyq sharýashylyǵy inspektsiiasynyń qyzmetkerleri quqyq qorǵaý, tabiǵat qorǵaý organdarynyń jáne UQK Shekara qyzmetiniń ókilderimen birge tabiǵat qorǵaý zańnamasy buzylǵan 1231 derekti anyqtady. Balyq qorǵaý zańdylyǵyn buzǵan 895 adam ákimshilik jaýapkershilikke tartyldy. Sondai-aq, 63 is sotqa joldanyp, brakonerlik deregimen 54 qylmystyq is qozǵaldy. Zań buzýshylarǵa jalpy somasy 19,7 million teńgeden astam aiyppul salynǵan.
«Zańsyz balyq aýlaýshylardan 21 tonna balyq tárkilendi. Onyń ishinde 1 852 keli bekire tuqymdas balyq túrleri, 755 gramm bekire tuqymdas balyq ýyldyryǵy bar. Sý aidyndarynan 621 balyq aýlaý quraly, 140 sý kóligi alyndy», - deidi Jaiyq-Kaspii oblysaralyq balyq sharýashylyǵy inspektsiiasynyń bas mamany Temirhan Ońaibaev.
Onyń aitýynsha, kún saiyn ózen arnasy men teńiz akvatoriiasy tekserilip, jalpy uzyndyǵy 22 shaqyrymǵa jeterlik 2 139 balyq aýlaý quraldary alyndy. Bul balyqtardyń ýyldyryq shashý ortasyna kedergisiz ótýine yqpal etken.
