اتىراۋ, ماڭعىستاۋ جەنە باتىس قازاقستان وبلىستارىنىڭ سۋ ايدىندارىندا ەكٸ ايعا سوزىلعان «بەكٸرە-2022» بالىق قورعاۋ اكتسيياسى اياقتالدى. براكونەرلەردەن 21 توننا بالىق تەركٸلەنٸپ, 19,7 ملن تەڭگە ايىپپۇل سالىندى, دەپ حابارلايدى قازاقپارات.
جايىق-كاسپيي وبلىسارالىق باسسەيندٸك بالىق شارۋاشىلىعى ينسپەكتسيياسىنىڭ قىزمەتكەرلەرٸ قۇقىق قورعاۋ, تابيعات قورعاۋ ورگاندارىنىڭ جەنە ۇقك شەكارا قىزمەتٸنٸڭ ٶكٸلدەرٸمەن بٸرگە تابيعات قورعاۋ زاڭناماسى بۇزىلعان 1231 دەرەكتٸ انىقتادى. بالىق قورعاۋ زاڭدىلىعىن بۇزعان 895 ادام ەكٸمشٸلٸك جاۋاپكەرشٸلٸككە تارتىلدى. سونداي-اق, 63 ٸس سوتقا جولدانىپ, براكونەرلٸك دەرەگٸمەن 54 قىلمىستىق ٸس قوزعالدى. زاڭ بۇزۋشىلارعا جالپى سوماسى 19,7 ميلليون تەڭگەدەن استام ايىپپۇل سالىنعان.
«زاڭسىز بالىق اۋلاۋشىلاردان 21 توننا بالىق تەركٸلەندٸ. ونىڭ ٸشٸندە 1 852 كەلٸ بەكٸرە تۇقىمداس بالىق تٷرلەرٸ, 755 گرامم بەكٸرە تۇقىمداس بالىق ۋىلدىرىعى بار. سۋ ايدىندارىنان 621 بالىق اۋلاۋ قۇرالى, 140 سۋ كٶلٸگٸ الىندى», - دەيدٸ جايىق-كاسپيي وبلىسارالىق بالىق شارۋاشىلىعى ينسپەكتسيياسىنىڭ باس مامانى تەمٸرحان وڭايباەۆ.
ونىڭ ايتۋىنشا, كٷن سايىن ٶزەن ارناسى مەن تەڭٸز اكۆاتوريياسى تەكسەرٸلٸپ, جالپى ۇزىندىعى 22 شاقىرىمعا جەتەرلٸك 2 139 بالىق اۋلاۋ قۇرالدارى الىندى. بۇل بالىقتاردىڭ ۋىلدىرىق شاشۋ ورتاسىنا كەدەرگٸسٸز ٶتۋٸنە ىقپال ەتكەن.
