Qaraqiia aýdanynda sapar-ortalyǵynyń salynýyna bailanysty qoǵamdyq tyńdaý ótkizildi. Nátijesinde Bozjyradaǵy týristik ortalyq shatqaldan 4 shaqyrym qashyqtyqta salynady, dep habarlaidy "Ult aqparat" oblys ákiminiń baspasóz qyzmetine silteme jasap.
QR Prezidenti Qasym-Jomart Toqaev Mańǵystaý oblysyndaǵy Bozjyra tabiǵi qoryǵynyń aýmaǵyna salynatyn vizit-ortalyǵynyń jobasyn Úkimetke qaita qaraýdy tapsyrǵan bolatyn.
Osyǵan orai oblys basshylyǵy qoǵamdyq keńestiń, ekolog-sarapshylardyń pikirin eskere otyryp, investorlarmen birlesip qonaq úi salý úshin jańa oryn qarastyrdy. Investorlardyń aitýynsha, Bozjyra shatqalyndaǵy sapar-ortalyǵy Jabaiushqan qoryǵynyń aýmaǵynan tys, shatqaldyń «azý tisterinen» 4 shaqyrym qashyqtyqta salý josparlanýda. Bul biiktikke 4 shaqyrymnan jaqyn eshqandai qurylys tehnikasy barmaidy degen sóz. Jabaiushqan aýmaǵynda eshqandai qurylys júrmeidi.
Joba avtorlary, investorlar men Qaraqiia aýdanynyń basshylary Senek aýylynyń turǵyndarymen kezdesip, jobany tanystyrdy. Aýyl aqsaqaldary usynys-pikirlerin bildirdi.
2021 jyldyń 5 aqpanynda aýdan ortalyǵynda «qorshaǵan ortaǵa áserdi baǵalaý» boiynsha taǵy da qoǵamdyq tyńdaýlar ótkizý josparlanyp otyr. Aita ketý kerek, infraqurylym júrgizý úshin investor tek «jasyl» tehnologiialardy qoldanatyn bolady. Týristik nysandy qurýdyń arqasynda 200-den astam jergilikti turǵyn turaqty jumyspen qamtylady dep kútilýde.
