QR Energetika ministri Qanat Bozymbaev ministrliktiń keńeitilgen alqa otyrysynda Qazaqstandaǵy janar-jaǵarmai salasyndaǵy ahýal týraly baiandady, dep habarlaidy "Ult aqparat".
“2017 jylmen salystyrǵanda munaidy qaita óńdeý kólemi 8,6 paiyzǵa artyp, 16,4 mln tonnany qurady. Aǵymdaǵy jyly 17,2 mln tonna munai óńdeý josparlanǵan, bul 2018 jylmen salystyrǵanda 5 paiyzǵa kóp. Munai ónimderiniń negizgi túrlerin óndirý kólemi 2018 jyly 2017 jylǵa qaraǵanda 9,4 paiyzǵa artty. Aǵymdaǵy jylǵy jospar - 2018 jylǵy deńgeiden 5 paiyzdyq ósimmen 12,2 mln tonna boldy”, - dedi Bozymbaev.
2018 naryqty otandyq munai ónimderimen qamtý kelisidei kórsetkishke jetken: benzin – 93,2%, dizel otyny – 91,1%, áýe kerosini – 62%.
“Biyl naryqty otandyq benzin, dizel otyny, áýe kerosinimen 100% qamtamasyz etemiz. Alǵashqy jarty jyldyqta munai ónimderin Ortalyq Aziia elderine eksporttaýdy josparlap otyrmyz. Zańnamalyq baza aiaqtalý satysynda”, - dedi ministr.
Ol vitse-ministr Bolat Aqsholaqovqa zańnamaǵa ózgerister engizý men kelisimderdi ratifikatsiialaý máselelerin qatań baqylaýǵa alýdy tapsyrdy.
Ministr benzin baǵasynyń tómendegenin de atap ótti.
"2018 jyldyń basynan Ai-92 markaly benzinniń bólshek baǵasynyń 4% tómendeýi baiqalady. Biyl aqpan aiynda Almaty qalasynda Ai-92 markasynyń eń tómengi baǵasy 139 teńgeni qurady", - dedi Energetika ministrliginiń basshysy.
