QR Energetika ministri Qanat Bozymbaev otandyq benzindi eksporttaý máselesi týraly aityp berdi, dep habarlaidy "Ult aqparat".
«Biyl biz ózimizdiń munai ónimderin kórshilerge tasymaldaýdy bastaimyz. Búgin Almatyda qyrǵyz áriptesterimizben aradaǵy kelissózder aiaqtalyp jatyr. Kelesi aptada Senatta Qazaqstan men Resei arasyndaǵy kelisimdi ratifikatsiialaý máselesi qaralady. Buǵan deiingi qujatta óz elimizden munai ónimderin eksporttaýǵa tyiym salynǵan bolatyn. Al jańa kelisim ol shekteýdi alyp tastap, ekportymyzǵa jol ashatyn bolady. Sondyqtan, shamamen naýryz aiynda, osy toqsannyń aiaq jaǵyna qarai biz eksportty bastaityn shyǵarmyz», - dedi Q.Bozymbaev qoǵamdyq keńestiń otyrysynda.
Ministrdiń aitýynsha, munai óńdeý zaýyttaryn modernizatsiiadan ótkizgennen keiin daiyn ónimniń kólemi artqan. Al, eń bastysy, janar-jaǵarmaidyń sapasy K-4 jáne K-5 dárejesine deiin kóterildi.
«Negizi, aǵymdaǵy jyldyń birinshi toqsanynda bizde benzin artyǵymen óndiriledi. Mazýt ta, áýekerosini de solai. Sondyqtan biz munai ónimderin kóbinese Ortalyq Aziia elderine tasymaldaýdy josparlap otyrmyz. Bárimiz jaqsy bilemiz, Qazaqstan uzaq jyldar boiy munai ónimderi boiynsha netto-importer boldy. Munai óndirýshi memleket bolsaq ta, osy saladaǵy ónimderdi importtap keldik. Endi munai óńdeý zaýyttaryn jańǵyrtqannan keiin óz ónimderimiz kóbeidi. Sony eksportqa shyǵarý qajet», - dep atap kórsetti Q.Bozymbaev.
