Energetika ministri Qanat Bozymbaev AES salý týraly sheshim mindetti túrde qoǵamdyq tyńdaýlardan keiin qabyldanatynyn aitty, dep habarlaidy QazAqparat.
«El Prezidenti Qasym-Jomart Toqaevtyń Máskeýge sapary barysynda reseilik taraptan Qazaqstanda atom elektr stansasyn salý múmkinshiligine qatysty usynys aityldy. Qazaqstanda stansa salý múmkindigine qatysty jumystar sońǵy 7-8 jylda júrgizilip kele jatqandyǵyn atap ótkim keledi. Búgingi kúni tehnikalyq-ekonomikalyq negizdeme bóliginiń ázirlengen kezeńde turmyz. Oǵan sáikes 5 eldiń beiindi kompaniiasyna ózderiniń usynystaryn bildirýi úshin hat joldandy. Olar: AQSh, Frantsiia, Koreia, Qytai jáne Resei. Bul olardyń tehnologiialyq, kommertsiialyq jáne ekonomikalyq parametrler boiynsha ózderiniń tehnikalyq-ekonomikalyq usynystaryn berýi úshin jasaldy. «Rosatom» da osyndai usynys aldy»,- dedi ministr Úkimet otyrysynan keiin BAQ ókilderine bergen suhbatynda.
Osy oraida Qanat Bozymbaev búgingi kúni elimizdiń aýmaǵynda atom elektr stansasyn salýǵa qatysty naqty sheshimniń áli qabyldanbaǵanyn aitty.
«Biz áli de bul máseleni zerdeleý kezeńinde turmyz. Buǵan qosa ózge de jobalarmen jumys istep jatyrmyz. Shymkentte iri gaz-bý qurylǵysyn salý, Almatyda JES-2-ni gazǵa aýystyrý arqyly jańǵyrtý jáne elektr energiiasyn óndirý qýatyn arttyrý, sonymen qatar birneshe sý elektr stansasyn salý kózdelýde. Sondyqtan munyń barlyǵyn birge qamtyp qaraý qajet. Taǵy da aitamyn, eshqandai sheshim joq», - dedi ministr.
Sondai-aq ol boljamǵa sáikes, 2030 jylǵa qarai Qazaqstanda elektr energiiasynyń tapshylyǵy oryn alýy múmkin ekendigin ashyq aitty.
«Sebebi jyl saiyn elektr energiiasyn tutyný artyp keledi. Sondyqtan qalai bolǵanda da 2030 jylǵa qarai jańa qýat kózin salý qajet. Eger Úkimet atom elektr stansasyn salý týrashy sheshim qabyldaityn bolsa, onda ol ashyq, el halqymen qoǵamdyq tyńdaýlar ótkiý arqyly keńesilgennen keiin qabyldanady», - dedi Q.Bozymbaev.
