QR Premer-Ministri Baqytjan Saǵyntaevtyń tóraǵalyǵymen ótken Úkimettiń kezekti otyrysy Prezidenttiń Qaýipsizdik keńesiniń otyrysynda bergen tapsyrmalarynyń oryndalý barysy týraly máseleden bastaldy. Elektr energiiasy men kómir tarifterin túsirý boiynsha júrgizilip jatqan jumystar týraly energetika ministri Qanat Bozymbaev aityp berdi.
Eske salaiyq, Memleket basshysynyń tóraǵalyǵymen ótken Qaýipsizdik keńesiniń otyrysynda elektr jáne jylý energiiasyna qoldanystaǵy tarifterdi qalyptastyrý, sonymen qatar energetika qyzmetteri naryǵyndaǵy baǵanyń túzilýine baqylaýdy qamtamasyz etetin memlekettik organdardyń jumysy máseleleri talqylanǵan edi.
Q.Bozymbaev Memleket Basshysynyń tapsyrmasyna sáikes Energetika ministrligi elektr energiiasyna arnalǵan shekti tarifterdiń obektivti deńgeiin belgileý boiynsha jumystardy aiaqtap jatqanyn málim etti. Ótken aptada atqarylǵan jumystyń aldyn ala nátijeleri Jumys tobynyń qaraýyna usynyldy. Onyń otyrysyna Prezident Ákimshiligi, Bas prokýratýra, memlekettik organdar men Ulttyq kásipkerler palatasynyń ókilderi qatysty. Otyrys barysynda elektr energiiasyna arnalǵan shekti tarifterdiń usynylǵan deńgeii talqylandy.
«Eki komponenttiń qosyndysy boiynsha elektr energiiasynyń qunyn tómendetýdiń ortasha ólshemdi deńgeii shekti tarifterdiń qoldanystaǵy deńgeiiniń 25 paiyzyn quraidy. Energetika ministrliginiń tásili tujyrymdamaly qoldaý tapty», — dedi Q.Bozymbaev.
Budan basqa, Jumys tobynyń otyrysynda qýat tarifiniń shekti shamasyn (1 MVt úshin 700 myń teńgeden 590 myń teńge shamasyna deiin) tómendetý qajettigi týraly másele usynyldy. Bul túpki tutynýshylar úshin elektr energiiasynyń qunyn tómendetýdi qamtamasyz etedi.
Energetika ministrliginiń málimetteri boiynsha, otyrystyń nátijeleri boiynsha Ulttyq kásipkerler palatasynyń resmi ustanymy alyndy. Bul kriteriilerdi anyqtaityn tiisti buiryq jobasyn osy kúnniń sońyna deiin kelisý jáne tirkeý úshin Ádilet ministrligine engizýge múmkindik beredi.
«Biz osy aptanyń sońyna deiin qýatqa jańa tarif mólsherin bekitýdi boljap otyrmyz. Bul biylǵy jylǵy jeltoqsannyń birinshi onkúndiginde ortalyqtandyrylǵan saýda-sattyq ótkizýge múmkindik beredi. Saýda-sattyq nátijesi boiynsha energiia óndirýshi uiymdardyń elektr energiiasyna shekti tarifteri bekitiletin bolady», — dedi energetika ministri.
Sonymen qatar, Q.Bozymbaev eki aspektiniń mańyzdylyǵyn atap ótti: elektr stantsiialary úshin «kem degende» aǵymdaǵy kómir baǵasyn saqtaý jáne deldaldyq qurylymdardy alyp tastap, kómirdi tasymaldaý qunyn tómendetý; 2019 jylǵy 1 qańtardan bastap energiia berýshi jáne energiiamen jabdyqtaýshy uiymdarda tarifterdi aǵymdaǵy shamanyń deńgeiinen tómendetý.
Taýarlyq gaz boiynsha, Energetika ministrligi taýarlyq gazdyń shekti kóterme baǵalaryn tómendetý kózdelgen buiryq jobasyn ázirledi. QR EM baǵalaýynsha, 2019 jylǵy 1 qańtardan bastap shekti kóterme saýda baǵasyn tómendetý — taýarlyq gazdyń túpkilikti baǵasyn óńirge bailanysty gaz paidalanatyn elektr stantsiialary úshin 12-22%-ǵa tómendetýge múmkindik beredi.
Qazirgi ýaqytta ministrlik turǵyndar úshin jylý jáne elektr energiiasyn óndiretin otyn-energetikalyq keshenderge taýarlyq gazdyń bólshek saýda baǵalaryn esepteý arqyly Ulttyq ekonomika ministrliginiń Tabiǵi monopoliialardy retteý komitetinen shekti kóterme baǵa deńgeiin rastaýyn kútip otyr.
Energetika ministrliginiń shekti kóterme gaz baǵasyn tómendetýine bailanysty Tabiǵi monopoliialardy retteý komiteti elektr stantsiialarǵa gazdyń bólshektik baǵasyn tómendetý jónindegi tiisti buiryqtar qabyldaityn bolady.
Elektr energiiasynyń jáne taýarlyq gaz baǵasyn tómendetý sharalary Energetika ministrliginiń tiisti buiryqtaryn bekitý túrinde 01.01.2019 jyldan bastap óz kúshine enedi.
