QR Ekologiia, geologiia jáne tabiǵi resýrstar vitse-ministri Erlan Nysanbaev elordada Botanikalyq baq mańynda sport keshenin turǵyzý týraly daýly pikirlerge jaýap berdi, dep habarlaidy QazAqparat.
Onyń aitýynsha, BAQ-ta habarlanǵan jańa sport kesheni botanikalyq baq aýmaǵyna emes, onyń mańaiyndaǵy park aýmaǵyna salynady. Al park – elorda ákimshiligi quzyryndaǵy kommýnaldyq menshik.
«Jalpy botanikalyq baqtar ǵylymi-zertteý jumystaryn júrgizip, jańa ósimdik túrlerin jersindirip, jergilikti aýa raiyna beiimdeý úshin qajet. Sol sebepti de Nur-Sultan qalasyndaǵy Botanikalyq baq erekshe qorǵalatyn tabiǵi qoryq bolyp esepteledi. Syrttan alyp kelgen ósimdikterdi astananyń qolaisyz aýa raiynan, qysqy aiazynan qorǵaý úshin ainalasyn parkpen qorshaǵan edik. Bul bastamanyń basy-qasynda ózim de júrgenmin.
Búginde bul ýchaskede Soltústik Qazaqstanǵa, Shyǵys, Ońtústik, Batys Qazaqstanǵa jáne Soltústik Amerikaǵa tán aǵashtar ektik. Munda tek qana ǵylymi-zertteý jumystary júrgiziledi jáne onyń aýmaǵynda eshqandai nysan salynbaǵan», - dep atap ótti Erlan Nysanbaev QazAqparat tilshisine bergen suhbatynda.
Vitse-ministrdiń aitýynsha, botanikalyq baq pen ony qorshaǵan park aýmaǵy jalpy 89,2 gektar jerdi alyp jatyr. Onyń ishinde 46,3 gektary ǵana ministrlik ókilettigine kiretin, erekshe qorǵaýdaǵy botanikalyq baq bolyp esepteledi.
«Botanikalyq baqtyń búgingi dúniejúzilik tájiribesine qarasaq, osydan 25-30 jyl buryn botanikalyq baqta adam júrýge bolmaidy degen uǵym bolatyn. Al qazir kóptegen elderde botanikalyq baqtar halyqtyń demalatyn ornyna ainaldy. Árine, kelýshiler de mádenietti saqtap, erekshe qorǵalatynyn túsinip, qoqys tastamaýǵa, lastamaýǵa tyrysýy kerek. (...)
Naqty sport keshenin alsaq, ol botanikalyq baq syrtyndaǵy, jergilikti organ balansyndaǵy parkte turǵyzylady. Park zonasynda halyqtyń demalys infraqurylymyn jasaýdy ákimdik sheshedi. Ol bizdiń ministrliktiń quzyrynda emes. Óz pikirim boiynsha, atalǵan orynǵa sporttyq keshendi salýǵa bolady. Ol botanikalyq baqqa esh áser etpeidi jáne zańǵa qaishy emes. Al oiyn-saýyq ortalyqtary syndy iri nysandar salýǵa árine, jol bermes edik», - dep túsindirdi vitse-ministr.
