Memlekettik áleýmettik saqtandyrý qorynan zańsyz tólem alǵandarǵa qatysty qylmystyq ister qozǵalyp, myńnan astam áiel jaýapkershilikke tartyldy. Bul týraly eńbek jáne halyqty áleýmettik qorǵaý vitse-ministri Viktoriia Shegai málimdedi, dep habarlaidy ult.kz.
Vitse-ministrdiń aitýynsha, qazirgi ýaqytta áleýmettik tólemderdi zańsyz alý faktileri boiynsha 38 qylmystyq is tergelip jatyr. Aldyn ala derekterge sáikes, keltirilgen zalal kólemi shamamen 3 milliard teńgeni quraidy.
Osy ýaqytqa deiin 9 is boiynsha sot úkimi shyǵarylyp, zańsyz shemalardy uiymdastyrǵan tulǵalarǵa qatysty jaza taǵaiyndalǵan.
Mamandardyń túsindirýinshe, keibir jaǵdailarda áielder jalǵan jumysqa rásimdelip, keiin júktilik jáne bosaný boiynsha áleýmettik tólemderdi zańsyz alǵan. Osylaisha memleket qarajatyn maqsatsyz paidalaný derekteri anyqtalǵan.
Qazirgi tańda barlyq faktiler boiynsha tergeý amaldary jalǵasyp jatyr.
