Foto: weproject.media
Astana turmysqa jaily shahar bolýy kerek. Bul týraly Prezident Qasym-Jomart Toqaev elordany damytý máseleleri jónindegi keńes otyrysynda aitty, dep habarlaidy "Ult aqparat" Aqordanyń baspasóz qyzmetine silteme jasap.
«Eń aldymen, qalany damytý tujyrymdamasyn qaita qaraǵan jón. Qazir Astanada saiabaqtar jetispeidi. Turǵyndar serýenge shyǵatyn, demalatyn oryndar az.
Biraq qala ákimdigi muny eskermei, qurylysqa ruqsat beredi. Bos turǵan jerge birden turǵyn úi salynady. Saiabaqtardy, jaiaý adamǵa arnalǵan kóshelerdi kóbeitý qajet. Qalany josparlaǵan kezde munyń bárin aldyn-ala oilastyrý kerek.
Qazir Esildiń jaǵasyna durys kóńil bólinbei otyr. Mysaly, kórshi eldegi Qazan qalasynyń tájiribesin zerttep kórýge bolady. Bul qalanyń kósheleri, saiabaqtary jáne jaǵalaý alańdary óte ádemi jáne tartymdy. Bizdiń maqsatymyz – Elordamyzdy jyldyń kez kelgen mezgilinde halqymyzǵa jáne shetel adamdaryna barynsha qolaily etý, Astananyń kelbetin meilinshe jaqsartý» - dedi Memleket basshysy.
Sondai-aq Prezident kólik júrýge tyiym salynǵan kósheler jóninde másele qozǵady.
«Ózenge jaiaý adam júretin kópirler salý kerek. Mundai ótkel, ásirese, qazir salynyp jatqan Táýelsizdik dańǵylyndaǵy kópirdiń mańaiyna qajet. Kólik júrýge bolmaityn kósheler jóninde talai ret aityldy. Biraq qalada ondai bir de bir kóshe salynǵan joq.
Jalpy, álemdik tájiribede dál osyndai kósheler kóptep salynady. Bul máseleni muqiiat oilastyrý kerek. Bilikti mamandardy tartyp, ońtaily sheshim qabyldaýǵa bolady. Mysaly, bizde EKSPO aýmaǵy bar. Bir qaraǵanda, óte ádemi jer. Biraq qańyrap bos jatyr.
Shyn máninde, oǵan jan bitirip, jurt jappai demalatyn orynǵa ainaldyrýǵa bolady. Qoǵamdyq keńistikti damytýdyń biryńǵai tujyrymdamasyn qabyldaǵan jón. Nysandardy jobalaý jáne salý kezinde osy tujyrymdamaǵa súiený qajettigi zańdy túrde bekitilýge tiis» - dedi Toqaev.
Memleket basshysynyń sózinshe, elordada salynyp jatqan keibir ǵimarattar bir-birimen múlde úilespeidi.
«Biz qalanyń kelbetin saqtap qalýymyz kerek. Astanada álemniń eń úzdik sáýlet úlgileri qoldanylýy kerek. Buǵan deiin qalanyń biryńǵai dizain-kody ázirlendi. Biraq bul qujat qaǵaz júzinde ǵana qaldy.
Salynyp jatqan keibir ǵimarattar bir-birimen múlde úilespeidi. Qalanyń ońtústik-shyǵys aýdanynda syrtqy sipaty syn kótermeitin, bei-bereket salynǵan nysandar kóp.
«Artem» jáne «Tulpar» saýda ortalyqtarynyń mańyn da retke keltirý kerek. Ákimdik naqty sharalar qabyldaýǵa tiis» - dedi Prezident.
Odan bólek, Qasym-Jomart Toqaev Astanada qala kelbetin buzatyn jarnama kóbeiip ketkenin de sóz etti.
«Taǵy bir másele bar. Qalanyń kelbetin buzyp turǵan ala-qula jarnamalar óte kóp. Onyń bári talapqa sai bolýy kerek. Sondai-aq qalada orynsyz qurylys jumystary kóbeiip ketti, iaǵni úilerdiń arasyna ǵimarat salyna beretin boldy. Bul ásirese, «Myńjyldyq» alleiasynda, Saraishyq, Syǵanaq, Turan, Beisekov kóshelerinde qatty baiqalady.
Turǵyndarǵa áleýmettik nysan, saiabaq nemese oiyn alańy salynady dep ýáde beriledi. Alaida, ol jerde iin tiresken ǵimarattar paida bolady. Mysaly, «Olimp palas-2» turǵyn-úiiniń aýlasyndaǵy oiyn alańynyń ornyna záýlim keńse salynǵan.
Mundai qurylysty birjola doǵarý kerek. Áitpese, sheshim qabyldaǵan tiisti laýazym ieleri jemqorlyqqa bailanysty jaýapqa tartylady. Sebebi osyndai sheshimderdiń astarynda qurylys kompaniialarynyń ákimdikte jumys isteitin adamdarmen birge azamattarymyzdyń yqylasyna qarsy qabyldaǵan áreketteri jatyr» - dedi Memleket basshysy keńes otyrysynda.
