Ulybritaniia premer-ministri Boris Djonson 7 shildedegi málimdemesinde ornyn bosatatynyn málimdedi. Degenmen ol óz sózinde Konservativter partiiasynyń jańa lideri sailanǵansha premer qyzmetinde bola beretinin de jetkizdi. Partiia ishindegi sailaý qazan aiynda ótýi múmkin.
Osy aptada Ulybritaniia úkimetiniń quramyndaǵy elýden astam saiasatker premerge senimsizdik tanytyp, qyzmetinen ketken. Olardyń qatarynda qarjy ministri Rishi Sýnak pen densaýlyq saqtaý ministri Sadjil Javadi bar.
Djonsonǵa senimsizdik tanytýdyń naqty bir sebebi joq, buǵan osyǵan deiin bolǵan birneshe shýly oqiǵa sebep bolyp otyr. Máselen, Britaniiada koronavirýs órship, úkimet búkil elde lokdaýn jariialaǵanda Boris Djonson bastaǵan sheneýnikter premer rezidentsiiasynda kesh uiymdastyrǵan. Osydan soń Ulybritaniia parlamentinde Konservativti partiia ókilderi Djonsonǵa senimsizdik votýmyn jariialap, daýysqa saldy. Daýys berý kezinde Djonsondy qoldaǵandar kóp bolyp, ol premer qyzmetinde qalǵan.
Ekinshi daý Konservativti partiianyń joǵary laýazymdy múshesi Kris Pincherdi parlamentte beldi qyzmetke taǵaiyndaǵan soń shyqty. Buǵan deiin Pincher mas kúiinde jabyq klýbta eki er adamǵa qyryndady dep aiyptalǵan edi, onyń ústinen parlamentte tekseris júrip jatqan. Boris Djonson Pincherge qatysty júrip jatqan tekseriske qaramastan ony qyzmetke taǵaiyndady. Osydan soń Djonsonǵa qatysty daý qaita kúsheidi.
YouGov saýalnamasyna sai, Ulybritaniiada halyqtyń 60 paiyzy úkimettiń jumysyna senbeidi, al Djonsonǵa senbeitinderdiń úlesi – 71 paiyz. Eger Britaniiada ótken aptada parlament sailaýy bolsa liberalister konservativterdi jeńip, basym daýysty ie bolar edi deidi áleýmettanýshylar.
