11 qańtar kúngi boran saldarynan elordada 26 turǵyn úige zaqym keldi. Bul týraly Astana qalasy ákiminiń baspasóz hatshysy Elvira Júrgenbaeva aitty, dep habarlaidy QazAqparat.
«Keshe aýa raiynyń qolaisyzdyǵyna bailanysty Astana qalasynyń ákimi Áset Isekeshev tótenshe jaǵdai jariialaǵan bolatyn. Jariialanǵan tótenshe jaǵdai búgin toqtatyldy. Astana qalasy boiynsha 26 turǵyn úi kesheni zaqymdandy. Atap aitqanda, Almaty aýdanynda 4, Saryarqa aýdanynda 8 jáne Esil aýdanynda 14 turǵyn úige zaqym keldi. Iaǵni qasbetteri ushyp, terezeleri synǵan», - dedi ol.
E.Júrgenbaevanyń sózine qaraǵanda, boran saldarynan 4 mektep, 3 balabaqsha aitarlyqtai búlingen. Sonymen qatar S.Seifýlin atyndaǵy Qazaq agrottehnikalyq ýniversitetiniń shatyry jartylai ushyp ketip, biraz shyǵyn keltirgen.
«Qazirgi ýaqytta shyǵyndardy ornyna keltirý jumystary júrgizilýde. Munan bólek 16 aialdama búlinip, 131 baǵdarsham ornynan qozǵalyp ketti.
Páter ieleri kooperativterimen jáne turǵyndarmen aýdan ákimderi tyǵyz jumys jasaýda. Keltirilgen shyǵyndar eseptelýde», - dedi elorda ákiminiń baspasóz hatshysy.
Onyń dereginshe, 2 kúnniń ishinde 82 myń tekshe metr qar qala syrtyna shyǵaryldy. Qar tazalaý jumystaryna 2 myńnan astam jumysshy, 2600 arnaiy tehnika jumyldyryldy.
