Qairat Boranbaev pen Qairat Satybaldyulyna qatysty qamaýǵa alý merzimi uzartyldy, - dep habarlaidy "Ult aqparat".
"2022 jylǵy 8 maýsymda Nur-Sultan qalasynyń mamandandyrylǵan aýdanaralyq tergeý soty kúdikti Boranbaevqa qatysty qamaýǵa alý túrindegi sanktsiialanǵan bultartpaý sharasynyń merzimin 1 aiǵa uzartty", - dedi elordalyq sottyń baspasóz qyzmeti ókilderi.
Osy kúni mamandandyrylǵan aýdanaralyq tergeý soty Qairat Satybaldyulyn qamaýǵa alý merzimin bir aiǵa uzartty. Al odan bir kún buryn, 2022 jyldyń 7 maýsymynda kúdikti Qairat Satybaldyulynyń burynǵy áieli Gúlmira Satybaldyǵa qatysty qamaýǵa alý merzimi uzarǵan.
Eske salaiyq, Sybailas jemqorlyqqa qarsy qyzmet laýazymdyq ókilettikterin asyra paidalaný jáne «Qazaqtelekom» AQ qarajatyn asa iri kólemde urlaý faktileri boiynsha qylmystyq isti tergep jatyr. Bul qylmystardy jasady degen kúdikpen Qairat Satybaldyuly ustalyp, ýaqytsha ustaý izoliatoryna qamaldy.
Qairat Satybaldy – Tuńǵysh Prezident Nursultan Nazarbaevtyń nemere inisi.
Aita keteiik, onyń burynǵy áieli de qamaýǵa alynǵan. Gúlmira Satybaldynyń ústinen 2019 jyly «Almaty qalasyndaǵy 2017 jylǵy Ýniversiada» nysandary qurylys-montaj jumystarynyń naqty oryndalmaǵan mindetteri úshin tólengen asa iri mólsherde biýdjet qarajatyn jymqyrý faktisi boiynsha sotqa deiingi tergeý júrip jatyr.
Al Qairat Boranbaev biyl 17 naýryzda qamaýǵa alyndy. Ol kvazimemlekettik sektorda asa iri kólemde qarajat jymqyrdy degen kúdikke ilindi.
Boranbaev – iri kásipker, ol Qazaqstandaǵy, Belarýstegi jáne Reseidiń birneshe óńirindegi McDonald's jyldam tamaqtaný jelisiniń jáne taǵy basqa iri kompaniialardyń iesi. Onyń qyzy Álima 2020 jyly jazda Nursultan Nazarbaevtyń qaitys bolǵan jieni Aisultanǵa turmysqa shyqqan.
Mamyrdyń basynda Satybaldyuly da, Boranbaev ta Forbes reitingindegi Qazaqstannyń eń bai biznesmenderi tiziminen shyǵarylǵany belgili boldy.
