Astanada politsiia basqarmasy ǵimaratynyń mańyna bomba qoiylǵany týraly jalǵan habar bergen 34 jastaǵy qala turǵynyna qatysty sot úkimi shyqty, dep habarlaidy ult.kz.
Oqiǵa ótken jyldyń qarasha aiynda bolǵan. Er adam 102 arnasyna qońyraý shalyp, Baiqońyr aýdandyq politsiia basqarmasy ǵimaratynyń aldyndaǵy oryndyqqa jarylǵysh zat qoiylǵanyn habarlaǵan. Tekserý barysynda aqparattyń shyndyqqa sáikes kelmeitini anyqtaldy.
Sot otyrysynda aiyptalýshy kinásin tolyq moiyndap, jasaǵan áreketine ókinetinin aitty. Onyń aitýynsha, sońǵy jyldary aýyr jeke kúizelisterdi bastan ótkerip, psihologiialyq qiyndyqtarǵa tap bolǵan.
Is materialdaryna sáikes, buǵan deiin de ol arnaiy qyzmetterdi kórineý jalǵan shaqyrǵany úshin birneshe ret ákimshilik jaýapkershilikke tartylǵan.
Sot onyń túsiniktemesin, jeke basyna qatysty mán-jailardy jáne istiń barlyq dálelderin zerdelei otyryp, qoǵamǵa qaýip tóndiretin mundai áreket qatań jazalanýy tiis degen qorytyndyǵa keldi.
Nátijesinde sot astanalyqty eki jylǵa bas bostandyǵynan aiyryp, jazasyn qaýipsizdigi barynsha tómen qylmystyq-atqarý júiesi mekemesinde óteýdi mindettedi. Sonymen qatar oǵan maskúnemdikten emdelý kýrsynan ótý júkteldi.
