QR Aqparat jáne qoǵamdyq damý vitse-ministri Bolat Tilepov úkimettik emes uiymdar jumysyndaǵy basym baǵyttardy atady, dep habarlaidy QazAqparat.
«El-jurtymyzdyń turmysyn jaqsartyp, ómir sapasyn kóterý isinde azamattyq kúshterdiń úlesi de, salmaǵy da erekshe. Al endi ómir sapasy degenimizdiń ózi jinaqtap aitqanda árbir otbasynyń molshylyq pen berekeli turmysy, myqty densaýlyǵy, balalarynyń sapaly bilim men jaqsy tálim-tárbiesi, qaýipsizdigi men qolaily qorshaǵan ortasy. Bul rette árine, birqatar basym, mańyzdy baǵytqa bergen durys. Bizdiń oiymyzsha, birinshiden - bilim berýdiń sapasyn arttyrý men tárbie isin jetildirý. Aitalyq, mektep jasyndaǵy balalardyń arasynda salaýatty ómir saltyn nasihattaý, tán men jan saýlyǵyn qamtamasyz etý, kásiptik baǵyt berý, olardyń biik rýhani kelbetin qalyptastyrý jáne taǵy da basqa kóptegen taqyryp qoǵamdyq uiymdar úshin erekshe den qoiyp, maqsatty sharalar júrgizetin dúnieler», - dedi Bolat Tilepov «Táýelsizdiktiń 30 jyldyǵyn ótkizýdegi azamattyq sektordyń róli» taqyrybynda ótken kezdesý barysynda.
Vitse-ministrdiń aitýynsha, ekinshiden, densaýlyq saqtaý men meditsinalyq qyzmettiń sapasyn arttyrý baǵyty boiynsha onyń qoljetimdiligin arttyrý, meditsinalyq saqtandyrý máselesin nasihattaý, jalpy pandemiia siiaqty qoǵamdyq indetterge qarsy turý, túrli psihologiialyq keńes berý ortalyqtarynyń jumysyn uiymdastyrý taqyrybyndaǵy jobalar ózekti.
«Úshinshiden, halqymyzdyń salaýatty ómirin jappai jaqsartý isinde tán saýlyǵy tek sport, dene shynyqtyrý ǵana emes, rýhani ómirdiń tazalyǵy, til men din, mádeniet pen ádebiet, salt pen dástúr máseleleri alǵa shyǵady. Árine, bul jalpy máseleler. Desek te, bul jumystyń qai-qaisysyn alsań da nátijesin ózderińiz siiaqty kózi ashyq, kókiregi oiý, bilimi keń, biligi mol azamattar men uiymdarsyz kózge elestetý múmkin emes», - dedi ol.
