Foto: Almaty oblysynyń baspasóz qyzmeti
Aýyl sharýashylyǵy ministrliginiń Jer resýrstaryn basqarý komiteti Qapshaǵai men Ile ózeniniń boiyndaǵy zańsyz berilgen jer telimderi birtindep memleket menshigine qaitarylyp jatqanyn málimdedi, dep habarlaidy Informbiýro baǵdarlamasy.
Tekserý barysynda sý qorǵaý aimaǵynda ornalasqan birneshe ýchaskeniń zańsyz rásimdelgeni anyqtalǵan. Atalǵan jerlerdiń keibiri joǵary laýazymdy sheneýnikterdiń, eks-prezidenttiń týystary men iri biznesmenderdiń atyna tirkelgen.
Zańsyz jer bólý naýqany 2000 jyldardyń basynda bastalǵan. Sol kezde qala ákimdigi "demalys oryndaryn salý úshin" gektarlap jer úlestirgen. Keiin bul ýchaskeler birneshe ret satylyp, yqpaldy tulǵalardyń ieligine ótken.
Másele depýtat Baqytjan Bazarbektiń depýtattyq saýalynan keiin kóterildi. Ol óz sózinde jer telimderiniń kóbi resmi qujattarmen rásimdelgenimen, olardyń sý qorǵaý aimaǵynda jatqanyn atap ótken.
Komitettiń málimetinshe, tekseris nátijesinde kólemi 1 gektardan asatyn bir ýchaskeniń Bolat Nazarbaevtyń atyna rásimdelgeni anyqtalǵan. Tiisti ýchaskelerdi memleket menshigine qaitarý jumystary jalǵasyp jatyr.
Eske salaiyq, buǵan deiin májilis depýtaty Baqytjan Bazarbek Almaty oblysyndaǵy jer telimderin zańsyz bólý derekterine qatysty málimdegen edi. Onyń aitýynsha, sý qorǵaý aimaǵynda ornalasqan jerler qarapaiym halyqqa emes, eks-sheneýnikter men belgili kásipkerlerge berilgen. Depýtattyń málimetinshe, Ile aýdanyn 14 jyl basqarǵan burynǵy ákim Nikolai Logýtov jerlerdi óz týystarynyń atyna rásimdegen. Qazir bul ýchaskelerdiń kóbi onyń uly Konstantin Logýtovtyń ieliginde, jalpy kólemi 10 myń gektardan astam. Bazarbek Bas prokýrordan bul isti jeke baqylaýǵa alýdy jáne yqpaldy tulǵalar tarapynan tekserýshilerge jasalyp jatqan qysym faktilerin tekserýdi surady.
