Pavlodar oblysynyń ákimi Bolat Baqaýov biznes salasyndaǵy túitkilderdi anyqtaý maqsatynda 80-nen astam kásipkerdi iskerlik tańǵy asqa shaqyrdy, dep habarlaidy pavlodarnews.kz saity.
Bolat Baqaýov kásipkerlerge qyzyqtyrǵan barlyq suraqtaryn qoiýdy usyndy. Onyń aitýynsha, búgingi kúni bilik halyqpen túrli tásilder arqyly, onyń ishinde onlain-rejimde tildesýge tyrysýda. Al Pavlodar oblysynyń biznesmenderimen keri bailanys ornatý úshin jeke alańdar qurý josparlanyp otyr.
«Men árbir kásipkerge jeke kóńil aýdaramyn. ShOB ókilderi belsendi jáne tiimdi jumys jasaýy úshin bizge ne isteý kerektigin aityńyzdar. Biz jeke sektordy qoldaý men yntymaqtastyqtyń barlyq nusqalaryn qarastyrýǵa daiynbyz. Sizder kez kelgen suraqty qoia alasyzdar. Al, biz jaqyn arada olarǵa jaýap beremiz», - dedi aimaq basshysy.
Kásipkerler bul qarym-qatynastyń formatyn qoldady. Tańǵy asta kezdesý olardyń kópshiligine tek óz oilarymen bólisip qana qoimai, áleýetti seriktestermen jolyǵyp, basqa kásipkerlermen de yntymaqtastyq ornatýǵa múmkindik berdi.
«Biznes mundai kezdesýlerge muqtaj. Óitkeni, bizde memlekettik qyzmetkerlerge qoiatyn suraqtar jii bolady. Sondyqtan oblys basshylyǵynyń kásipkerlerge barlyq esikterdi ashýǵa degen umtylysyn tolyǵymen qoldaimyz», - dedi «Ertis Business Association» kásipkerler qaýymdastyǵynyń tóraǵasy Aslan Kýniiarov.
Iskerlik tańǵy asqa jinalǵandardyń aldynda Nur-Sultannan kelgen qonaqtar sóz sóiledi. Olardyń ishinde Qazaqstandyq indýstriia jáne eksport ortalyǵy basshysynyń orynbasary Turar Jolmaǵambetov boldy. Onyń aitýynsha, búgingi kúni joǵary óńdelgen ónimder shyǵaratyn kásiporyndar eksportty ósirý úshin qoldaý taba alady. Óńirdegi qubyrlar men kabeldi óndirýshiler shet elderge ónim jetkizý úshin tasymaldaý shyǵyndaryna 200 million teńgege deiin ótemaqy ala alady.
«Kásipker veb-saittarda nemese baspa betterinde kez kelgen qoldaý baǵdarlamalary týraly aqparat kórgende, ol adamda qosymsha suraqtar týyndaidy. Sol sebepti, biz biznesmendermen túrli máselelerdi talqylap alý úshin bundai kezdesýlerdi quptaimyz. Betpe-bet kezdesý árqashan tiimdi bolyp keledi», - dedi indýstriia jáne eksport ortalyǵynyń ókili.
Bir shynyaiaq shaidyń ústinde biznesmender óz máseleleri týraly aityp berdi. Mysaly, «Fresh Milk» JShS basshysy Oleg Tolmachev óndiretin sút ónimderin shet elge jetkizýdi uiymdastyra almai júrgendigin málim etti.
«Bizdiń kompaniia 2017 jyly Gonkongtaǵy halyqaralyq kórmege qatysty. 2018 jyly biz Londonǵa attandyq. Sodan keiin sheteldik kompaniialarmen birneshe kelisimshartqa qol qoidyq. Búgin qaida bolsyn habarlassaq ta, qujattarǵa bailanysty túrli kedergilerdiń kesirinen ónimderdi ózge elge jetkizýdi bastai almai otyrmyz. Syrtqy naryqqa shyǵý úshin bizge kómek qajet», - dep surady biznesmen.
Barlyq qoiylǵan suraqtarǵa jaýap berýge jáne muqtaj kásipkerlerge barynsha qoldaý kórsetýge ýáde berildi. Sonymen qatar, Pavlodar oblysynyń ákimi úsh aida bir ret biznesmendermen iskerlik tańǵy asta kezdesýge sóz berdi.
