Biyl elimizde 13,3 mln tonna munai ónimderin óndirý josparlanyp otyr. Bul týraly QR Energetika ministri Bolat Aqsholaqov aitty, dep habarlaidy QazAqparat.
«2021 jyldyń qorytyndysy boiynsha munai ónimderin óndirý 12,7 mln tonnany qurady. Munai ónimderiniń negizgi túrlerinen: benzin óndirisi – 4,8 mln tonna, dizel otyny – 4,9 mln tonna, mazýt – 2,4 mln tonna jáne aviakerosin – 586 myń tonna. 2022 jylǵa arnalǵan jospar 13,3 mln tonna quraidy. Sondai-aq Prezidenttiń tapsyrmasyna sáikes Energetika ministrliginiń buiryǵymen 180 kún merzimge munai ónimderin bólshek saýdada ótkizýge shekti baǵalar mynadai deńgeide belgilendi: AI-92 markaly benzin – litrine 182 teńge; AI-93 markaly benzin – litrine 182 teńge; AI-95 markaly benzin – litrine 215 teńge; dizel otyny (jazǵy, maýsymaralyq) – litrine 230-260 teńge», - dedi ol ministrliktiń keńeitilgen alqa otyrysynda.
Onyń atap ótýinshe, Prezidenttiń «Jańa Qazaqstan: jańartý jáne jańǵyrtý joly» atty Joldaýy aiasynda sharýalardy janar-jaǵarmai materialdarynyń qajetti kólemimen qolaily baǵa boiynsha qamtamasyz etý jumystary júzege asyrylatyn bolady.
«Búgingi kúni aýyl sharýashylyǵy taýaryn óndirýshilerdiń kóktemgi egis jumystaryn ýaqtyly jáne turaqty júrgizýi úshin munai óńdeý zaýyttaryna 1 tonnasyna 212 myń teńge baǵasymen 400 myń tonna dizel otyny (176 teńge/litr) bólindi. Jetkizý men saqtaýdy eskere otyryp, óńirge bailanysty boljamdy baǵa aýyl sharýashylyǵy taýaryn óndirýshileri úshin bólshek saýda baǵasynan orta eseppen 15-30 paiyzǵa tómen», - degen Bolat Aqsholaqov táýliktik negizde tiep-jóneltýge baqylaý men monitoringti qamtamasyz etýdi vitse-ministr Áset Maǵaýovqa tapsyrdy.
