Keshe ǵana Úkimet saǵatynda QR Mádeniet jáne sport ministri Arystanbek Muhamediuly óner jáne mádeniet qyzmetkerleriniń eńbekaqysy jaily aityp berdi. Májilis depýtaty Qýanysh Sultanovtyń kótergen máselesine ministrdiń bergen jaýaby qoǵam arasynda qyzý talqyǵa tústi. Osy rette, Qazaqstannyń eńbek sińirgen qairatkeri Bolat Ábdilmanovty az-kem áńgimege tartqan edik. Rasynda, «ash adam shyǵarmashylyqtyń shyńyna jetedi» degen maǵynadaǵy paiym qanshalyqty durys? Álde biz jańsaq túsindik pe? Jalpy, óner adamdaryna qanshalyqty jaǵdai jasalyp jatyr?
- Arystanbek Muhamediulynyń parlamentte sóilegen sózinen keiingi alaquiyn áńgimege ne aitar edińiz?
- Jol qýǵan – qazynaǵa jolyǵady, sóz qýǵan pálege jolyǵady, deidi atam qazaq. Ár nárseniń joly, jóni bar emes pe? Keide, isine qaramai sózin baǵyp, eńbegin baǵalamai ózin baǵyp otyramyz. ...Áleýmettik jelilerde ártúrli adamdar otyrady delik, endi eldiń jaǵdaiyn aitady degen keibir arnalar men keibir saittar da adamnyń sózin burmalai bastady. Bul ne? Óner degen erikkenniń ermegi emes...
Elbasymyzdyń «Bolashaqqa baǵdar: Rýhani jańǵyrý» atty maqalasynyń maqsat-murattaryn oryndaýda, rýhani salada qyzmet etip otyrǵan barlyq mekemelerdegi óner adamdaryna túsetin salmaq aýyr. Olardyń atqaryp jatqan eńbekteri – aýyz toltyryp aitarlyqtai bolyp, erteń materialdyq máselesi sheshilip jatsa, el bolashaǵynyń mártebesi de biik emes pe?...
Osyǵan qoldaý kórsetip, qamqorlyǵyn jasap otyratyn Mádeniet jáne sport ministri de – jai adam emes.
- Sonda, ministr jai adam emes qoi, siz úshin?
- Suraǵyńnyń astaryn túsinip otyrmyn...
Keshir, ainalaiyn, ministrge jaǵynaiyn, jaqsattanaiyn dep otyrǵan joqpyn. Ataq-dáreje, maqtaý-marapat kerek bolsa, men eńbegime laiyq, bul ministrge deiin-aq alyp qoiǵanmyn bárin.
Ministrdiń suhbatyndaǵy eki aýyz sózdi aiaǵyna jetkizbei burmalap, tonyn teris ainaldyryp, halyqqa basqasha jetkizý kimge kerek boldy? Joq, bireýdiń tapsyrmasy ma? Tapsyrma bolmaǵan jaǵdaida, bireýge qyzyq kerek pe? Men túsinbedim.
Al, ministrdiń jeke basyna kelsek, ony Elbasynyń ózi taǵaiyndaidy. Eger, durys jumys istei almasa, osy orynda otyrar ma edi? Tipti, keshe esep bergende, depýtattar da jumysyna oń baǵasyn berdi. Endigi jumysyna senim bildirdi.
Qazaq handyǵynyń 550 jyldyǵynda da, dúniejúzin aýzyna qaratyp, aidy aspanǵa shyǵarǵan EKSPO-2017 kórmesinde de qanshama qyrýar jumystar atqaryldy. Bel ortasynda júrip ózimiz de maqtandyq. Buryn-sońdy bolmaǵan mádeni is-sharalardy kórgende álemniń túkpir-túkpirinen kelgen qonaqtardyń arasynda tańdai qaqpaǵan jan qalmady.
Elbasynyń «Bolashaqqa baǵdar: rýhani jańǵyrý» maqalasyndaǵy baǵdarlamalardyń barlyq júgin arqalap kele jatqan da osy mádeniet pen sport salasy. Áli de atqarylar qanshama sharýalar bar.
Sol jasalyp jatqan, endi jasalar sharalardyń báriniń basy-qasynda «jaǵdai joq, ailyǵymyz az» – demei-aq, atan túieniń júgin kóterip júremiz áli...
Qalai bolǵanda da qazaq rýhaniiatynyń kóterer júgi qashan da aýyr. Táýelsizdik alǵaly beri talai qiyndyqtardy basynan ótkerip kele jatqan qazaq óneri óz mindet-paryzynan ainyǵan joq. Barlyqta tasyǵan joq, joqtyqta jasyǵan joq. Óitkeni, óner adamy bolǵan soń, qazaq úshin, óziniń týǵan ulty úshin, olar árqashan aianbai qyzmet etýge daiyn.
Taǵy da aitaiyn, men jaǵympazdyqtan aýlaqpyn, eńbekti baǵalaý kerek, eńbek baǵalaný kerek... «Eldik kerek, birlik kerek..» - dep, Elbasy aitqandai, sonyń báriniń basynda aýyzbirshilik turady.
Sondyqtan, ainalaiyn ini-qaryndastyrym, ár sózdiń salmaǵy bolatynyn umytpai, aitar-jazar sózimizge abai bolaiyq!
«Samaýyryndy sý alypty degendi, Samarqandy sý alypty» dep jetkizýdiń qajeti qansha?
Osy ónerde ózegim talyp 35 jyldai eńbek etip kelemin. Aǵa jasyna kelgende aqiqatty aityp, shyndyq jaǵynda turýǵa meniń de quqyǵym bar.
- Rahmet, ashyq pikirińizge.
Ult portaly
.jpg)