Bilim jáne ǵylym ministri Ashat Aimaǵambetov Memleket basshysynyń bilim salasyna qatysty tapsyrmalary qalai oryndalatynyn málim etti, dep habarlaidy "Ult aqparat".
«Ulttyq qoǵamdyq senim keńesiniń mamyr aiyndaǵy otyrysynda bilim men ǵylymdy damytý máseleleri negizgi taqyryp boldy. Otyrys qorytyndysy boiynsha Memleket basshysy Qasym-Jomart Toqaev bilim jáne ǵylym júiesi úshin mańyzdy tapsyrmalar berdi. Mysaly, pedagogikalyq mamandyqtarǵa túsetin abitýrientterge qoiylatyn talaptardy arttyrý jáne stipendiia mólsherin 42 myń teńgege deiin ulǵaitý tapsyrmasy berildi. Ótken jyly stipendiia mólsheri 21 myń teńgeni qurasa, Prezidenttiń tapsyrmasynan keiin jeltoqsan aiynda 26 myń teńgege deiin ósti. Al 1 qyrkúiekten bastap bolashaq pedagogterdiń stependiiasy 42 myń teńge mólsherinde bolyp otyr», - dep jazdy ministr Facebook paraqshasynda.
Ministrdiń habarlaýynsha, bul barlyq mamandyqtardyń ishindegi eń joǵarǵy stipendiia bolady. Aita keterligi, stýdentter kesheden beri osy stipendiiany ala bastaǵan.
Sondai-aq, osy jyldyń maýsym aiynan bastap pedagogikalyq mamandyqtarǵa túsý úshin shekti ball birden 70-ke deiin kóterilgen.
«Pedagog mártebesi týraly zańdy qabyldaýdyń jáne atqarylǵan sharalardyń arqasynda biyl «Altyn belgi» tósbelgisi iegerleriniń arasynda pedagogikalyq mamandyqty tańdaǵandar sany 1,7 ese ósti, al kóptegen baǵyttar boiynsha ortasha ball 100-den asty. Eger birneshe jyl buryn pedagogikalyq mamandyqqa túsýshilerdiń ortasha baly 65-ti qurasa jáne pedagog mamandyǵy túlekter arasynda kóp suranysqa ie bolmasa, qazir joǵary ball jinaǵan myqty túlekter pedagogikalyq baǵyttar boiynsha oqýǵa túse bastady», - deidi ol.
Ashat Aimaǵambetov sonymen birge UQSK qorytyndysy boiynsha berilgen tapsyrmalar aiasynda doktoranttardyń stipendiiasy 102 myńnan 150 myń teńgege deiin óskenin jetkizdi. Mundai shara jas ǵalymdardy qoldaý úshin óte mańyzdy, óitkeni doktoranttardyń otbasylary bar jáne olar óz zertteýlerin júrgizýmen ainalysady.
«Budan bólek 2020 jylǵy qyrkúiek aiynan bastap memlekettik granttyń quny aitarlyqtai ósti. Bul nege mańyzdy? Bul joǵary oqý oryndary oqytýshylarynyń jalaqysyn arttyryp, materialdyq-tehnikalyq bazasyn nyǵaitýǵa múmkindik beredi. Prezidenttiń Ulttyq qoǵamdyq senim keńesiniń qorytyndysy boiynsha bergen tapsyrmalarynyń barlyǵy erekshe baqylaýda jáne belgilengen merzimde oryndalatyn bolady», - dep túidi ministr.
