Prezidenttik kadrlyq rezervke engen jastardyń biri – qaraǵandylyq Ulybek Qimanov. «Bolashaq» baǵdarlamasy boiynsha AQSh-ta oqyp kelgen azamat QazAqparat tilshisine ne úshin kadrlyq rezervke ótinim bergenin áńgimelep berdi.
Jasy otyzdan asqan Ulybek Qimanov osydan on jyl buryn «Bolashaq» baǵdarlamasy boiynsha AQSh-tyń Arizon memlekettik ýniversitetin qalalyq jobalaý boiynsha bakalavryn bitirgen. Osydan keiin bilimin L.Gýmilev atyndaǵy Eýraziia ulttyq ýniversitetinde qurylys salasy boiynsha magistrlik bilim alǵan. 2013-2016 jyldary Nazarbaev Ýniversitetinde jobalardy basqarý keńsesinde eńbek etse, odan soń «Talan Towers» kompaniiasynda qurylys alańdaryn basqarǵan. Taǵy eki jyl «Kaskad» biznes-ortalyǵynda basshylyq qyzmette bolǵan. Elordadaǵy Máńgilik el qaqpasy, Botanikalyq baq jobalaryn jasaýda atsalysqan.
«Prezidenttik kadrlyq rezervke ótkennen keiin oblystardan birshama usynys túsip jatyr. Atap aitqanda, Shyǵys Qazaqstan, Túrkistan, Qostanai, Qaraǵandy oblystaryndaǵy ákimdiktiń qurylymdarynan jumys usynyldy. Mamandyǵyma sai qurylys basqarmasyna, kei óńirdiń ishki saiasat basqarmasyna shaqyryldym. Sonymen birge, Nur-Sultan qalasy men Ulttyq bankten bir usynystan keldi. Jaqynda «Astana LRT» kompaniiasynyń basshysymen kezdestim. Ulttyq bank basshysymen de kezdesýdi kútip júrmin. Qalǵan usynystar boiynsha oilanyp kórsem deimin. Ár usynystyń men úshin mańyzy zor», - deidi ol.
Ulybek Qimanov túpkilikti sheshim qabyldaý úshin oilanyp júrgenin aitady.
«Prezidenttik kadrlyq rezerv týraly alǵash aqparatty estigen kezde Memleket basshysynyń ideiasy birden kóńilimnen shyǵyp, kóp oilanbai tapsyryp kórýdi jón dep sheshtim. Eger salalyq jobalarǵa atsalysýǵa múmkindik týyp jatsa, memleketke paidaly bola alsam, onda álbette, bul jolda qyzmet etkim keledi. Sebebi, qazir jeke sektorda eńbek etemin. 10 jyldyq tájiribemdi, bilim-biligimdi memlekettik jobalarǵa jumsai alamyn. Sol sebepti, memlekettik qyzmette eńbek etýge niettimin», - dedi Ulybek Qimanov.
Eske sala ketsek, osydan birneshe kún buryn Aqordada Memleket basshysy Qasym-Jomart Toqaev Prezidenttiń kadr rezervine engen 300 jaspen kezdesý ótkizgen bolatyn. Jiynda Qasym-Jomart Toqaev el jastaryna úndeý joldady.
.jpeg)